យោងតាមការចុះផ្សាយពីប្រភពបរទេស អ្នកដែលទៅប្រទេសកូរ៉េ ច្រើនសង្កេតឃើញថា ជនជាតិកូរ៉េចូលចិត្តប្រើចង្កឹះដែករាងសំប៉ែត និងស្លាបព្រាដងវែង ជំនួសចង្កឹះឈើ ឬឫស្សីដែលប្រទេសអាស៊ីជាច្រើនប្រើ។
មូលហេតុមួយគឺ ប្រវត្តិសាស្ត្រ។ កាលពីសម័យបុរាណ រាជវង្សកូរ៉េធ្លាប់ប្រើចង្កឹះប្រាក់ ដោយជឿថាវាអាចជួយរកឃើញសារធាតុពុលក្នុងអាហារ។ ទម្លាប់នេះក្រោយមកបានរីករាលដាលមកកាន់ប្រជាជនទូទៅ ហើយចង្កឹះប្រាក់ត្រូវបានជំនួសដោយលោហៈផ្សេងៗ និងដែកអ៊ីណុក។
ភាពងាយស្រួលក្នុងការសម្អាត ក៏ជាមូលហេតុសំខាន់។ ចង្កឹះដែកមិនងាយស្រូបទឹក មិនងាយជាប់ក្លិន ឬពណ៌អាហារ ហើយអាចលាងសម្អាតបានងាយជាងចង្កឹះឈើ។
ម្យ៉ាងទៀត ចង្កឹះដែកសមស្របនឹងអាហារកូរ៉េជាច្រើនដែលមានកំដៅខ្ពស់ និងគ្រឿងទេសច្រើន ដូចជា ស៊ុប សាច់អាំង និងគីមឈី។
ចង្កឹះដែករាងសំប៉ែតពិបាកចាប់ជាងចង្កឹះឈើពិតមែន ប៉ុន្តែជនជាតិកូរ៉េភាគច្រើនរៀនប្រើតាំងពីកុមារ ដូច្នេះវាបានក្លាយជាទម្លាប់ និងជាផ្នែកមួយនៃវប្បធម៌ប្រចាំថ្ងៃ។
លើសពីនេះ ការប្រើចង្កឹះដែកដែលអាចប្រើឡើងវិញបានយូរ ក៏ជួយកាត់បន្ថយការប្រើប្រាស់របស់របរប្រើតែម្តង និងកាកសំណល់ផងដែរ៕