ទឹកគឺជាធាតុផ្សំដ៏សំខាន់ដែលមិនអាចខ្វះបានសម្រាប់ទ្រទ្រង់ដំណើរការកោសិកា បញ្ចេញជាតិពុល និងរក្សាលំនឹងសីតុណ្ហភាពក្នុងរាងកាយ។ ទោះជាយ៉ាងណា ការទទួលទានទឹកមិនបានត្រឹមត្រូវតាមក្បួនខ្នាតសុខភាព ក៏អាចបង្កផលរំខានដល់ប្រព័ន្ធរំលាយអាហារ និងសរីរាង្គខាងក្នុងដោយមិនដឹងខ្លួន។
១. ផឹកទឹកប្រញាប់ ឬផឹកម្ដងច្រើនពេក
ការផឹកទឹកច្រើនក្អឹកក្នុងល្បឿនលឿន ធ្វើឱ្យទឹកមិនអាចលាយឡំបានល្អជាមួយទឹកមាត់ដែលមានជាតិអាល់កាឡាំង ដើម្បីសម្រួលកម្រិតអាស៊ីតក្នុងក្រពះ។ លើសពីនេះ វានាំឱ្យក្រលៀនធ្វើការធ្ងន់ធ្ងរភ្លាមៗ និងបង្កឱ្យមានអារម្មណ៍តឹងពោះ ឬឆ្អល់ពោះ។
ដំណោះស្រាយ៖ គួរអង្គុយចុះ ហើយទទួលទានយឺតៗមួយក្អឹកៗម្តង។
២. ទាល់តែស្រេកទឹកខ្លាំងទើបផឹក
អារម្មណ៍ស្រេកទឹក គឺជាសញ្ញាចុងក្រោយដែលរាងកាយកំពុងស្ថិតក្នុងសភាពខ្សោះជាតិទឹកស្រាល (Dehydration) រួចទៅហើយ។ ការទុកឱ្យស្រេកទឹកខ្លាំងញឹកញាប់ អាចបណ្ដាលឱ្យចុះខ្សោយថាមពល ឈឺក្បាល ពិបាកផ្ដោតអារម្មណ៍ និងបង្កការពិបាកដល់ការបញ្ចេញកាកសំណល់របស់ក្រលៀន។
ដំណោះស្រាយ៖ គួរទទួលទានទឹកជាប្រចាំតាមចន្លោះពេលទៀងទាត់ពេញមួយថ្ងៃ ទោះបីជាមិនទាន់ស្រេកក៏ដោយ។
៣. ផឹកទឹកត្រជាក់ខ្លាំងពេលកំពុងញ៉ាំអាហារ ឬក្រោយហាត់ប្រាណ
ការផឹកទឹកកក ឬទឹកត្រជាក់ខ្លាំងភ្លាមៗនៅពេលញ៉ាំអាហារ អាចធ្វើឱ្យជាតិខ្លាញ់ក្នុងចំណីអាហារកកកុញ និងរារាំងការបញ្ចេញអង់ស៊ីមរំលាយអាហារ។ រីឯការផឹកទឹកត្រជាក់ខ្លាំងក្រោយពេលហាត់ប្រាណ អាចធ្វើឱ្យសរសៃឈាមកន្ត្រាក់ភ្លាមៗ និងប៉ះពាល់ដល់ចង្វាក់បេះដូង។
ដំណោះស្រាយ៖ គួរជ្រើសរើសទឹកសីតុណ្ហភាពធម្មតា ឬទឹកក្តៅឧណ្ហៗ។
៤. ផឹកទឹកច្រើនហួសប្រមាណភ្លាមៗមុន និងក្រោយពេលញ៉ាំបាយ
ការទទួលទានទឹកមួយកែវធំភ្លាមៗមុន ឬក្រោយបាយ នឹងធ្វើឱ្យទឹកក្រពះ និងអាស៊ីតរំលាយអាហារ (Gastric Juices) រាវខ្លាំង ដែលកាត់បន្ថយសមត្ថភាពក្រពះក្នុងការកិនបំបែកចំណីអាហារ បង្កជាអាការហើមពោះ ឆ្អល់ និងភើជូរ។
ដំណោះស្រាយ៖ គួរផឹកទឹកមុនពេលញ៉ាំបាយប្រមាណ ៣០ នាទី ឬរង់ចាំ ៣០ នាទីក្រោយបាយរួច ទើបទទួលទានទឹកច្រើន។
៥. ផឹកទឹកច្រើនខ្លាំងមុនពេលចូលគេង
ការផឹកទឹកច្រើននៅពេលជិតចូលគេង នឹងជំរុញឱ្យប្លោកនោមឆាប់ពេញ បង្ខំឱ្យអ្នកត្រូវភ្ញាក់ពីដំណេកកណ្តាលអធ្រាត្រដើម្បីបត់ជើងតូចញឹកញាប់ (Nocturia) ដែលជាហេតុរំខានដល់ដំណាក់កាលនៃការគេងលក់ស្កប់ស្កល់ (Deep Sleep)។
ដំណោះស្រាយ៖ កាត់បន្ថយការទទួលទានទឹកចាប់ពី ១ ទៅ ២ ម៉ោងមុនពេលចូលគេង។
ការកែប្រែទម្លាប់តូចតាចទាំងនេះ តាមរយៈការទទួលទានទឹកក្នុងបរិមាណសមល្មម យឺតៗ និងទៀងទាត់ នឹងជួយឱ្យរាងកាយទទួលបានអត្ថប្រយោជន៍ពេញលេញពីជាតិទឹក និងរក្សាប្រព័ន្ធរំលាយអាហារឱ្យមានសុខភាពល្អ។
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕