មនុស្សជាច្រើនតែងយល់ថា ផ្លែឈើគ្រប់ប្រភេទសុទ្ធតែល្អសម្រាប់ការតមអាហារ និងសម្រកទម្ងន់។ ប៉ុន្តែការពិត ផ្លែឈើមួយចំនួនមានផ្ទុកជាតិស្ករធម្មជាតិ (Fructose) និងកាឡូរីខ្ពស់ ដែលអាចធ្វើឱ្យកម្រិតអាំងស៊ុយលីនក្នុងឈាមកើនឡើង និងរារាំងដំណើរការដុតបំផ្លាញជាតិខ្លាញ់ ប្រសិនបើទទួលទានច្រើនហួសប្រមាណ។
១. ផ្លែស្វាយទុំ ៖ ស្វាយទុំជាផ្លែឈើដែលមានរសជាតិផ្អែមឆ្ងាញ់ ប៉ុន្តែស្វាយទុំមួយផ្លែខ្នាតមធ្យមអាចផ្ទុកជាតិស្កររហូតដល់ប្រមាណ ៤៥ ក្រាម។ ការញ៉ាំស្វាយទុំច្រើនអាចធ្វើឱ្យរាងកាយទទួលបានកាឡូរីលើសតម្រូវការយ៉ាងងាយស្រួល។
២. ផ្លែទំពាំងបាយជូរ៖ ទំពាំងបាយជូរមួយចានចង្កឹះតូច មានជាតិស្ករប្រមាណ ១៥ ទៅ ២៣ ក្រាម។ ដោយសារតែវាមានគ្រាប់តូចៗ និងងាយស្រួលញ៉ាំ ទើបធ្វើឱ្យយើងឧស្សាហ៍ញ៉ាំជក់មាត់រហូតភ្លេចខ្លួន និងលើសបរិមាណកំណត់។
៣. ផ្លែចេកទុំ៖ ចេកសម្បូរទៅដោយប៉ូតាស្យូម និងថាមពល ប៉ុន្តែចេកទុំមួយផ្លែក៏ផ្ទុកជាតិស្ករប្រមាណ ១៤ ទៅ ១៥ ក្រាម និងកាបូអ៊ីដ្រាតខ្ពស់ផងដែរ។ សម្រាប់អ្នកចង់ស្រកទម្ងន់ គួរញ៉ាំត្រឹមតែមួយផ្លែក្នុងមួយថ្ងៃ ឬញ៉ាំមុនពេលហាត់ប្រាណដើម្បីយកថាមពល។
៤. ផ្លែទុរេន៖ត្រូវបានគេប្រសិទ្ធនាមថាជា «ស្តេចផ្លែឈើ» ធុរេនមិនត្រឹមតែមានជាតិស្ករខ្ពស់ប៉ុណ្ណោះទេ ប៉ុន្តែថែមទាំងសម្បូរទៅដោយជាតិខ្លាញ់ និងកាឡូរីខ្ពស់ខ្លាំង។ ធុរេនត្រឹមតែពីរបីកង់ អាចផ្ដល់កាឡូរីស្មើនឹងបាយមួយចានពេញ។
៥. ផ្លែឈើក្រៀម (ដូចជា ផ្លែល្មើ ឬទំពាំងបាយជូរក្រៀម) ៖ នៅពេលផ្លែឈើត្រូវបានសម្ងួត ជាតិទឹកទាំងអស់ត្រូវបានបាត់បង់ ធ្វើឱ្យកំហាប់ជាតិស្ករ និងកាឡូរីកើនឡើងទ្វេដងធៀបនឹងផ្លែឈើស្រស់ក្នុងទម្ងន់ដូចគ្នា។
មិនចាំបាច់តមផ្លែឈើទាំងនេះទាំងស្រុងនោះទេ ប៉ុន្តែត្រូវកំណត់បរិមាណញ៉ាំឱ្យបានច្បាស់លាស់។ ប្រសិនបើចង់សម្រកទម្ងន់ឱ្យមានប្រសិទ្ធភាពខ្ពស់ គួរជ្រើសរើសផ្លែឈើដែលមានជាតិស្ករទាប និងជាតិសរសៃ (Fiber) ខ្ពស់ជំនួសវិញ ដូចជា ផ្លែប៉ោម ប័រ ត្របែក និងពពួកផ្លែប៊ឺរី (Berries)។