យោងតាមការចុះផ្សាយពីប្រភពបរទេស មនុស្សជាច្រើនចាប់ពីអាយុ ៤០ ឆ្នាំឡើងទៅ ចាប់ផ្តើមសង្កេតឃើញថា ងាយឡើងទម្ងន់ជាងមុន កម្លាំងរាងកាយថយចុះ គេងមិនសូវលក់ល្អ ហើយសមត្ថភាពទទួលយកស្រាក៏ថយចុះ។ អ្នកជំនាញចាត់ទុកថា នេះជាផ្នែកមួយនៃដំណើរការចាស់តាមធម្មជាតិ។
ប្រហែលអាយុ ៤៤ ឆ្នាំ សមត្ថភាពរាងកាយក្នុងការរំលាយខ្លាញ់ និងស្រាអាចចាប់ផ្តើមថយចុះ។ មនុស្សមួយចំនួនអាចសង្កេតឃើញថា ញ៉ាំអាហារដូចមុន ប៉ុន្តែងាយឡើងទម្ងន់ និងពិបាកគ្រប់គ្រងចង្កេះ។ សម្ពាធឈាម ជាតិស្ករ និងកូឡេស្តេរ៉ុលក៏អាចចាប់ផ្តើមគ្រប់គ្រងបានលំបាកជាងមុន។
ប្រហែលអាយុ ៦០ ឆ្នាំ ការប្រែប្រួលអាចពាក់ព័ន្ធកាន់តែច្រើនទៅនឹងការរំលាយកាបូអ៊ីដ្រាត និងប្រព័ន្ធភាពស៊ាំ។ នៅពេលរាងកាយចាស់ទៅ កម្លាំងសាច់ដុំក៏អាចថយចុះ ដែលធ្វើឱ្យកម្លាំង និងសមត្ថភាពធ្វើចលនាថយតាម។
ដើម្បី បន្ថយល្បឿននៃការចុះខ្សោយរបស់រាងកាយ អ្វីដែលគួរយកចិត្តទុកដាក់ជាពិសេសគឺរបបអាហារ។ គួរញ៉ាំអាហារឱ្យមានតុល្យភាព មានប្រូតេអ៊ីនគ្រប់គ្រាន់ ដើម្បីជួយរក្សាសាច់ដុំ និងកាត់បន្ថយអាហារផ្អែមខ្លាំង ខ្លាញ់ច្រើន និងប្រៃខ្លាំង។ គួរកាត់បន្ថយស្រា និងជៀសវាងការជក់បារី។
ជាមួយគ្នានេះ ការធ្វើចលនាជាប្រចាំ ការគេងឱ្យគ្រប់ និងការគ្រប់គ្រងជំងឺរ៉ាំរ៉ៃ ក៏សំខាន់ដែរ។ គោលដៅនៃការថែសុខភាពមិនមែនធ្វើឱ្យខ្លួនឯង “ក្មេងជារៀងរហូត” ទេ ប៉ុន្តែគឺរក្សាកម្លាំងរាងកាយ ការគិត និងសមត្ថភាពរស់នៅដោយខ្លួនឯងឱ្យបានយូរ។
សរុបមក អាយុ ៤៤ និង ៦០ ឆ្នាំ មិនមែនជារឿងដែលគួរភ័យខ្លាចឡើយ។ អ្វីដែលសំខាន់គឺចាប់ផ្តើមកែប្រែទម្លាប់រស់នៅឱ្យបានឆាប់ ដើម្បីឱ្យរាងកាយចាស់យឺត និងរក្សាសុខភាពបានល្អក្នុងវ័យចំណាស់៕