យោងតាមការចុះផ្សាយពីប្រភពបរទេស ដឹងថាការហាត់ប្រាណល្អចំពោះសុខភាព ប៉ុន្តែដល់ពេលត្រូវហាត់វិញ បែរជាមិនចង់ក្រោក។ ប្រសិនបើអ្នកកំពុងជួបបញ្ហានេះ អាចសាកល្បងវិធីងាយៗទាំង ៥ ដើម្បីបង្កើតទម្លាប់ហាត់ប្រាណឱ្យបានទៀងទាត់។
១. ចាប់ផ្តើមពីគោលដៅតូចៗ
កុំចាប់ផ្តើមដោយកំណត់ថាត្រូវហាត់រាល់ថ្ងៃ ឬត្រូវឃើញលទ្ធផលក្នុងរយៈពេលខ្លី។ អាចចាប់ផ្តើមត្រឹម ២–៣ ថ្ងៃក្នុងមួយសប្តាហ៍ ហើយបង្កើនបន្តិចម្តងៗតាមសមត្ថភាព។ គោលដៅតូចៗធ្វើឱ្យការហាត់ប្រាណមិនមើលទៅជារឿងលំបាកពេក។
២. រកមិត្តមកហាត់ជាមួយ
ប្រសិនបើហាត់ម្នាក់ឯងងាយបាត់កម្លាំងចិត្ត សាកល្បងហៅមិត្តភក្តិមកធ្វើជាដៃគូ។ មិនចាំបាច់ហាត់នៅកន្លែងតែមួយទេ អាចកំណត់គោលដៅជាមួយគ្នា និងរំលឹកគ្នាឱ្យធ្វើជាប្រចាំ។
៣. បើមិនដឹងចាប់ផ្តើមពីណា សុំជំនួយ
សម្រាប់អ្នកទើបចាប់ផ្តើម អាចសួរអ្នកជំនាញ ឬគ្រូបង្វឹកដែលមានចំណេះដឹង ដើម្បីជួយរៀបចំវិធីហាត់ប្រាណឱ្យសមស្របនឹងសមត្ថភាព និងគោលដៅរបស់ខ្លួន។
៤. ជ្រើសរើសការហាត់ប្រាណដែលខ្លួនចូលចិត្ត
មិនចាំបាច់ហាត់តាមអ្វីដែលកំពុងពេញនិយម ឬធ្វើដូចអ្នកដទៃឡើយ។ អ្នកអាចជ្រើសរើសការដើរលឿន រត់ ហែលទឹក រាំ យូហ្គា ភីឡាទីស ឬកីឡាដែលខ្លួនចូលចិត្ត។ អ្វីដែលធ្វើហើយមានអារម្មណ៍សប្បាយ នឹងងាយបន្តជាទម្លាប់ជាង។
៥. កត់ត្រារាល់ពេលដែលបានហាត់
កត់ចំណាំថា ថ្ងៃនេះហាត់អ្វី រយៈពេលប៉ុន្មាន និងមានអារម្មណ៍យ៉ាងណាបន្ទាប់ពីហាត់។ នៅពេលឃើញថាខ្លួនអាចធ្វើបានជាបន្តបន្ទាប់ វានឹងជួយបង្កើនទំនុកចិត្ត និងធ្វើឱ្យមើលឃើញការរីកចម្រើនរបស់ខ្លួនកាន់តែច្បាស់។
សរុបមក ប្រសិនបើអ្នកខ្ជិលហាត់ប្រាណ កុំចាប់ផ្តើមដោយបង្ខំខ្លួនឯងឱ្យហាត់ខ្លាំង។ ចាប់ផ្តើមពីអ្វីដែលតូច ងាយធ្វើ និងជ្រើសរើសសកម្មភាពដែលខ្លួនចូលចិត្ត។ នៅពេលធ្វើបានជាប្រចាំ ការហាត់ប្រាណនឹងក្លាយជាទម្លាប់ដោយមិនចាំបាច់បង្ខំខ្លួនខ្លាំង៕