យោងតាមការចុះផ្សាយពីប្រភពបរទេស មនុស្សជាច្រើនតែងមានអារម្មណ៍ធ្ងន់ត្របកភ្នែក ខ្សោយការផ្តោតអារម្មណ៍ ឬងងុយគេងក្រោយញ៉ាំអាហារថ្ងៃត្រង់។ អាការៈនេះអាចជារឿងធម្មតាមួយ ប៉ុន្តែប្រភេទ និងបរិមាណអាហារដែលញ៉ាំ ក៏អាចធ្វើឱ្យងងុយគេងកាន់តែខ្លាំងបានដែរ។
ហេតុអ្វីបានជាងងុយគេងក្រោយញ៉ាំអាហារ?
មូលហេតុអាចមកពីការរំលាយអាហារ ការញ៉ាំច្រើនពេក អាហារដែលមានកាបូអ៊ីដ្រាតចម្រាញ់ និងស្ករខ្ពស់ ការគេងមិនគ្រប់គ្រាន់ ព្រមទាំងការថយចុះនៃភាពស្វាហាប់របស់រាងកាយនៅពេលរសៀលតាមធម្មជាតិ។
ការងងុយគេងក្រោយអាហារ មិនមែនដោយសារឈាមហូរទៅក្រពះរហូតធ្វើឱ្យខួរក្បាលខ្វះឈាមនោះទេ។
អាហារ ៥ ប្រភេទដែលអាចធ្វើឱ្យងងុយគេងកាន់តែងាយ
១. បាយសាច់ជ្រូក ឬអាហារខ្លាញ់ច្រើន
អាហារដែលមានខ្លាញ់ និងថាមពលខ្ពស់ អាចធ្វើឱ្យពោះធ្ងន់ និងត្រូវការពេលយូរដើម្បីរំលាយ ដែលអាចធ្វើឱ្យមនុស្សមួយចំនួនមានអារម្មណ៍ស្ពឹកស្រពន់ និងមិនសូវស្វាហាប់។
២. បាយមាន់
បាយដែលប្រើប្រេង ឬខ្លាញ់ច្រើន អាចផ្តល់ថាមពលខ្ពស់ជាងបាយសធម្មតា។ ប្រសិនបើញ៉ាំក្នុងបរិមាណច្រើន ហើយបន្ថែមភេសជ្ជៈផ្អែមទៀត អាចធ្វើឱ្យទទួលថាមពលលើសតម្រូវការ។
៣. មី ឬប៉ាស្តាដែលមានម្សៅច្រើន
អាហារដែលផ្តោតសំខាន់លើម្សៅ និងមានប្រូតេអ៊ីនតិច អាចធ្វើឱ្យឆ្អែតមិនបានយូរ ហើយមនុស្សមួយចំនួនអាចងងុយគេង ឬឃ្លានឡើងវិញនៅពេលរសៀល។
៤. អាហាររហ័ស
ដូចជា ប៊ឺហ្គឺ មាន់បំពង និងដំឡូងបំពង ជាដើម ដែលជាទូទៅមានខ្លាញ់ អំបិល និងថាមពលខ្ពស់។ ប្រសិនបើញ៉ាំជាញឹកញាប់ វាអាចមិនសមស្របសម្រាប់អ្នកដែលត្រូវការផ្តោតអារម្មណ៍ធ្វើការនៅពេលរសៀល។
៥. បង្អែម និងភេសជ្ជៈផ្អែម
តែទឹកដោះគោ កាហ្វេផ្អែម ឬបង្អែមក្រោយអាហារ អាចធ្វើឱ្យជាតិស្ករក្នុងឈាមកើនឡើងលឿន ហើយធ្លាក់ចុះនៅពេលក្រោយ ដែលអាចធ្វើឱ្យមនុស្សមួយចំនួនមានអារម្មណ៍អស់កម្លាំង។
បើមិនចង់ងងុយគេងពេលរសៀល គួរញ៉ាំយ៉ាងដូចម្តេច?
គួរជ្រើសរើសប្រូតេអ៊ីនដែលមានខ្លាញ់តិច ដូចជា ត្រី សាច់មាន់ តៅហ៊ូ ឬស៊ុត បន្ថែមបន្លែឱ្យបានប្រហែលពាក់កណ្តាលចាន និងជ្រើសរើសអង្ករសំរូប ឬធញ្ញជាតិជំនួសម្សៅចម្រាញ់មួយផ្នែក។ គួរកាត់បន្ថយអាហារចៀន អាហារខ្លាញ់ និងភេសជ្ជៈផ្អែម ព្រមទាំងផឹកទឹកឱ្យគ្រប់គ្រាន់។
ក្រោយញ៉ាំអាហារ អាចដើរយឺតៗប្រហែល ៥–១០ នាទី ដើម្បីជួយឱ្យរាងកាយមានចលនា និងកាត់បន្ថយភាពស្ពឹកស្រពន់។
តើការងងុយគេងបែបណាគួរទៅជួបវេជ្ជបណ្ឌិត?
ប្រសិនបើងងុយគេងខ្លាំងជារៀងរាល់ថ្ងៃ ទោះបីគេងគ្រប់គ្រាន់ក៏ដោយ ឬមានអាការៈហត់នឿយខុសធម្មតា ស្រកទម្ងន់ដោយមិនដឹងមូលហេតុ ស្រេកទឹកខ្លាំង នោមញឹកញាប់ ឬងងុយដល់ថ្នាក់រំខានដល់ការងារ និងជីវិតប្រចាំថ្ងៃ គួរទៅពិនិត្យសុខភាព។ អាការៈទាំងនេះអាចពាក់ព័ន្ធនឹងជំងឺមួយចំនួន ដូចជា ជំងឺទឹកនោមផ្អែម ឬបញ្ហាឈប់ដកដង្ហើមពេលគេង។
សរុបមក ការងងុយគេងក្រោយអាហារថ្ងៃត្រង់អាចកើតពីកត្តាច្រើន ដូចជា ប្រភេទអាហារ បរិមាណអាហារ គុណភាពនៃការគេង និងនាឡិកាជីវសាស្ត្ររបស់រាងកាយ។ ការរៀបចំមុខម្ហូបដែលមានប្រូតេអ៊ីន បន្លែ និងកាបូអ៊ីដ្រាតស្មុគស្មាញក្នុងបរិមាណសមស្រប អាចជួយឱ្យឆ្អែតបានយូរ និងរក្សាភាពស្វាហាប់បានល្អជាងមុននៅពេលរសៀល៕