យោងតាមការចុះផ្សាយពីប្រភពបរទេស ការខឹង និងអារម្មណ៍ក្តៅក្រហាយ គឺជារឿងដែលមនុស្សគ្រប់គ្នាអាចជួបប្រទះ។ ប៉ុន្តែប្រសិនបើយើងបណ្តោយឱ្យអារម្មណ៍គ្រប់គ្រងការនិយាយ និងសកម្មភាព អាចធ្វើឱ្យបញ្ហាតូចក្លាយជារឿងធំ។ ដូច្នេះ ការរៀនគ្រប់គ្រងអារម្មណ៍ គឺជាជំនាញសំខាន់សម្រាប់ជីវិតប្រចាំថ្ងៃ។
១. ឈប់សិន ហើយរាប់ពី ១ ដល់ ១០
នៅពេលខឹងខ្លាំង កុំប្រញាប់និយាយ ឬធ្វើអ្វីភ្លាមៗ។ សាកដកដង្ហើមចូលចេញយឺតៗ ហើយរាប់ពី ១ ដល់ ១០។ ការផ្តោតលើការរាប់ និងការដកដង្ហើម អាចផ្តល់ពេលឱ្យខួរក្បាលស្ងប់ និងគិតមុននឹងប្រតិកម្ម។
២. កុំបន្តស្តាប់ ឬមើលអ្វីដែលជំរុញកំហឹង
ប្រសិនបើមនុស្សម្ខាងទៀតកំពុងនិយាយពាក្យដែលធ្វើឱ្យអ្នកកាន់តែខឹង សាកឃ្លាតចេញពីស្ថានការណ៍បន្តិច ប្រសិនបើអាចធ្វើបាន។ កុំបន្តប្រកែកនៅពេលអារម្មណ៍កំពុងឡើងខ្ពស់។
៣. ធ្វើអ្វីៗឱ្យយឺតជាងធម្មតា
នៅពេលខឹង សាកនិយាយយឺត ដើរយឺត និងគិតមុននឹងឆ្លើយ។ មុននឹងនិយាយ សួរខ្លួនឯងថា ពាក្យដែលកំពុងនិយាយនោះអាចដោះស្រាយបញ្ហាបាន ឬធ្វើឱ្យរឿងកាន់តែធ្ងន់ធ្ងរ?
៤. គិតពីផលប៉ះពាល់ដល់មនុស្សជុំវិញខ្លួន
ពេលខឹង យើងអាចគិតតែពីអារម្មណ៍របស់ខ្លួនឯង។ ប៉ុន្តែការប្រព្រឹត្តដោយកំហឹងអាចប៉ះពាល់ដល់គ្រួសារ មិត្តភក្តិ និងមនុស្សដែលយើងស្រឡាញ់។ ដូច្នេះ គួរគិតពីផលវិបាករយៈពេលវែង មុនធ្វើអ្វីដែលអាចស្តាយក្រោយ។
៥. សុំសម្រាកដើម្បីស្ងប់អារម្មណ៍
ប្រសិនបើស្ថានការណ៍នៅតែតានតឹង សាកនិយាយថា “សុំឱ្យខ្ញុំសម្រាកបន្តិចសិន” ហើយចាកចេញទៅកន្លែងស្ងប់។ អាចផ្តល់ពេលឱ្យខ្លួនឯងប្រហែល ១០–៣០ នាទី ដើម្បីដកដង្ហើម និងរៀបចំគំនិតឡើងវិញ។
៦. ចេះនិយាយពាក្យ “សុំទោស”
ការសុំទោសមិនមានន័យថា យើងជាអ្នកខុសគ្រប់រឿងនោះទេ។ យើងអាចសុំទោសចំពោះការនិយាយខ្លាំង ការបង្ហាញអារម្មណ៍មិនល្អ ឬអាកប្បកិរិយាដែលធ្វើឱ្យអ្នកដទៃឈឺចិត្ត។ ពាក្យសាមញ្ញនេះអាចជួយបន្ថយភាពតានតឹងបាន។
៧. រៀនអភ័យទោស និងចេះទម្លាក់រឿងតូចៗ
រឿងមួយចំនួនមិនសមនឹងយកមកធ្វើឱ្យខ្លួនឯងខឹងយូរទេ។ ដូចជា អ្នកបើកបរម្នាក់កាត់មុខ កម្មករបម្រើម្ហូបខុស ឬមាននរណាម្នាក់ធ្វើអ្វីមិនប្រុងប្រយ័ត្ន។ ប្រសិនបើអាចអភ័យទោស និងទម្លាក់រឿងតូចៗបាន នឹងជួយឱ្យជីវិតមានភាពស្ងប់សុខជាងមុន។
៨. ប្រសិនបើជាបញ្ហាផ្លូវច្បាប់ ទុកឱ្យច្បាប់ដោះស្រាយ
ប្រសិនបើអ្នកជឿថាខ្លួនមិនបានប្រព្រឹត្តខុស កុំប្រើកំហឹង ឬអំពើហិង្សាដើម្បីដោះស្រាយ។ គួររក្សាភាពស្ងប់ស្ងាត់ ប្រមូលព័ត៌មាន និងប្រើវិធីស្របច្បាប់។ ការប្រើអារម្មណ៍ខ្លាំងពេក អាចធ្វើឱ្យស្ថានការណ៍កាន់តែស្មុគស្មាញ និងបង្កផលវិបាកដល់ខ្លួនឯង។
សរុបមក នៅពេលខឹង មិនចាំបាច់បង្ខំខ្លួនឯងឱ្យឈប់ខឹងភ្លាមៗទេ។ អ្វីដែលសំខាន់គឺ កុំឱ្យកំហឹងក្លាយជាអ្នកសម្រេចចិត្តជំនួសយើង។ ឈប់សិន ដកដង្ហើម ស្ងប់ស្ងាត់ ឃ្លាតចេញពីស្ថានការណ៍ និងគិតពីផលវិបាក មុននឹងនិយាយ ឬធ្វើអ្វី៕