យោងតាមការចុះផ្សាយពីប្រភពបរទេស មិនសូវចូលចិត្តបន្លែ មិនមានន័យថាត្រូវខ្វះជាតិសរសៃ វីតាមីន និងសារធាតុចិញ្ចឹមឡើយ។ ការកិនបន្លែជាមួយផ្លែឈើអាចជាវិធីមួយដែលធ្វើឱ្យញ៉ាំងាយជាងមុន ប៉ុន្តែគួរផ្តោតលើការប្រើ ផ្លែឈើទាំងមូល និងមិនបន្ថែមស្ករច្រើន ដើម្បីរក្សាជាតិសរសៃ និងកុំឱ្យទទួលបានជាតិស្ករលើសកម្រិត។
រូបមន្តទី១៖ បៃតងស្រស់ស្រាយ
លាយស្ពៃខ្មៅជាមួយផ្លែប៉ោមបៃតង ម្នាស់ ទឹកដូង និងខ្ញីបន្តិច។ រូបមន្តនេះផ្តល់ជាតិសរសៃ វីតាមីន និងសារធាតុប្រឆាំងអុកស៊ីតកម្ម។
រូបមន្តទី២៖ ក្រហម-ផ្កាឈូក
លាយការ៉ុត មើមយ៉េន ប៉េងប៉ោះតូច និងផ្លែប៉ោមក្រហម។ អាហារទាំងនេះមានសារធាតុប្រឆាំងអុកស៊ីតកម្ម ដូចជា បេតាការ៉ូទីន និងលីកូពីន។
រូបមន្តទី៣៖ ពណ៌ទឹកក្រូច
លាយល្ពៅចំហុយ ក្រូច និងផ្លែផាសិន។ អាចបន្ថែមទឹកដោះគោស្រស់ ឬទឹកដោះអាល់ម៉ុនបន្តិច។ រូបមន្តនេះផ្តល់វីតាមីន និងជាតិសរសៃ។
រូបមន្តទី៤៖ ពណ៌ស្វាយ
លាយស្ពៃក្តោបស្វាយ ប្លូបឺរី និងទំពាំងបាយជូរក្រហម ជាមួយទឹក ឬយ៉ាអួធម្មជាតិ។ គ្រឿងផ្សំទាំងនេះសម្បូរទៅដោយសារធាតុប្រឆាំងអុកស៊ីតកម្ម ជាពិសេស Anthocyanins។
រូបមន្តទី៥៖ ស្រស់ស្រាលសម្រាប់ប្រព័ន្ធរំលាយអាហារ
លាយសេលេរី ត្រសក់ ផ្លែសារី ខ្ញី និងទឹកក្រូចឆ្មារបន្តិច។ ផ្លែសារី និងបន្លែផ្សេងៗផ្តល់ជាតិសរសៃ និងទឹក ដែលអាចជួយដល់ការរំលាយអាហារ។
រូបមន្តទី៦៖ លាក់បន្លែជាមួយប្រូតេអ៊ីន
លាយខាត់ណា ឬស្ពៃខ្មៅ ជាមួយចេក ម្សៅប្រូតេអ៊ីន និងទឹកដោះគោ ឬទឹកដោះអាល់ម៉ុន។ អាចបន្ថែមគ្រាប់ Chia ឬ Flaxseed បន្តិច ដើម្បីបង្កើនជាតិសរសៃ។
សរុបមក ទឹកបន្លែ-ផ្លែឈើអាចជាជម្រើសមួយសម្រាប់អ្នកដែលមិនសូវចូលចិត្តញ៉ាំបន្លែ ប៉ុន្តែ មិនគួរជំនួសបន្លែ និងផ្លែឈើទាំងមូលគ្រប់ពេលទេ។ គួរផឹកក្នុងបរិមាណសមរម្យ និងជៀសវាងការបន្ថែមស្ករ ទឹកឃ្មុំ ឬទឹកផ្លែឈើផ្អែមច្រើនពេក៕