ជំងឺមហារីកសុដន់ គឺជាជំងឺមហារីកដែលកើតឡើងញឹកញាប់បំផុតមួយលើស្ត្រី ប៉ុន្តែប្រសិនបើត្រូវបានរកឃើញទាន់ពេលវេលានៅដំណាក់កាលដំបូង អត្រាព្យាបាលជាសះស្បើយមានរហូតដល់ជាង ៩០%។ ការពិនិត្យសុដន់ដោយខ្លួនឯងជារៀងរាល់ខែ គឺជាវិធីដ៏សាមញ្ញ និងមានប្រសិទ្ធភាពបំផុតដើម្បីដឹងពីភាពប្រែប្រួលមិនប្រក្រតី។
១. ការប្រទះឃើញដុំរឹង ឬក្រហមក្រាស់
-មានដុំរឹងមិនឈឺចាប់នៅត្រង់បរិវេណសុដន់ ឬក្រោមក្លៀក។
-ដុំសាច់មហារីកភាគច្រើនរឹង មិនរអិលនៅពេលស្ទាប និងមានផ្ទៃមិនរលោង ប៉ុន្តែដុំទន់មួយចំនួនក៏មិនគួរមើលរំលងដែរ។
២. ការផ្លាស់ប្តូរទំហំ ឬរូបរាងនៃសុដន់
-សុដន់ម្ខាងមានការរីកធំ ខូចទ្រង់ទ្រាយ ឬហើមខុសធម្មតាធៀបនឹងម្ខាងទៀត។
-រូបរាងសុដន់ប្រែជាមិនស្មើគ្នា ឬស្រុតចុះក្រោមភ្លាមៗ។
៣. ស្បែកសុដន់ប្រែប្រួលខុសប្រក្រតី
-ស្បែកសុដន់ប្រែជារលាក ក្រហម កន្ទួល ឬមានសភាពដូច សំបកផ្លែក្រូច (Orange-peel texture) ដោយសារការស្ទះបំពង់ទឹករងៃ។
-ស្បែកមានស្នាមផតចូលក្នុង ឬជ្រួញដូចស្នាមខូងលើថ្ពាល់។
៤. ក្បាលសុដន់មានការប្រែប្រួល
-ក្បាលសុដន់ផត ឬទាញចូលក្នុង (Nipple Inversion) ដែលពីមុនមិនធ្លាប់មាន។
-ស្បែកជុំវិញក្បាលសុដន់ឡើងក្រហម រលាក របក ឬមានដំបៅរ៉ាំរ៉ៃមិនព្រមជា។
៥. មានទឹករាវ ឬឈាមហូរចេញពីក្បាលសុដន់
-មានសារធាតុរាវថ្លា ពណ៌លឿង ឬមានឈាមលាយឡំហូរចេញពីក្បាលសុដន់ដោយមិនបានច្របាច់ ជាពិសេសកើតឡើងលើសុដន់តែម្ខាង។
៦. អារម្មណ៍ឈឺចុកចាប់មិនបាត់
-ទោះបីជាដុំមហារីកដំបូងៗភាគច្រើនមិនបង្កការឈឺចាប់ក៏ដោយ ប៉ុន្តែការឈឺចុកចាប់ជាប់ជាប្រចាំនៅតំបន់ជាក់លាក់ណាមួយនៃសុដន់ ឬក្រោមក្លៀក (មិនទាក់ទងនឹងរដូវ) អាចជាសញ្ញាព្រមាន។
ពេលវេលា និងរបៀបពិនិត្យដោយខ្លួនឯង
-ពេលវេលាល្អបំផុត៖ ពិនិត្យនៅចន្លោះពី ៧ ទៅ ១០ ថ្ងៃ ក្រោយពេលមករដូវថ្ងៃដំបូង (ជាពេលដែលសុដន់ទន់ និងមិនហើមតឹង)។ ស្ត្រីអស់រដូវ គួរកំណត់ថ្ងៃជាក់លាក់ណាមួយក្នុងមួយខែ។
+ជំហានសាមញ្ញ ៣ យ៉ាង៖
សម្លឹងមើលកញ្ចក់ ៖ ដាក់ដៃទម្លាក់ចុះ រួចលើកដៃឡើងលើក្បាល ដើម្បីសង្កេតមើលរូបរាង ទំហំ និងស្បែកសុដន់។
ស្ទាបពេលឈរ/ងូតទឹក ៖ លើកដៃម្ខាងដាក់ក្រោយក្បាល ប្រើចុងម្រាមដៃទាំង ៣ ស្ទាបរង្វង់ជុំវិញសុដន់ថ្នមៗ រហូតដល់ក្លៀក។
ស្ទាបពេលគេង ៖ គេងរាបស្មើ កល់ខ្នើយក្រោមក្បាលស្មា រួចស្ទាបសុដន់ម្តងទៀតដើម្បីធានាថាមិនមានដុំកប់ជ្រៅ។
មិនមែនគ្រប់ដុំរឹងក្នុងសុដន់សុទ្ធតែជាមហារីកនោះទេ (ភាគច្រើនជាដុំគីសទឹក ឬសាច់ស្លូត)។ ប៉ុន្តែប្រសិនបើប្រទះឃើញសញ្ញាណាមួយខាងលើ គួរប្រញាប់ទៅជួបគ្រូពេទ្យឯកទេសដើម្បីពិនិត្យអេកូ (Ultrasound) ឬថតម៉ាម៉ូក្រាម (Mammogram) ឱ្យបានច្បាស់លាស់។