យោងតាមការចុះផ្សាយពីប្រភពបរទេស ការមើលភាពយន្ត ឬស៊េរីរឿងជាប់ៗគ្នាជាច្រើនម៉ោង រហូតដល់យប់ជ្រៅ អាចមើលទៅជាការកម្សាន្តធម្មតា ប៉ុន្តែបើធ្វើជាប្រចាំ អាចប៉ះពាល់ដល់ភ្នែក ប្រព័ន្ធសាច់ដុំ ឆ្អឹង ការគេង និងសុខភាពផ្លូវចិត្ត។
ប៉ះពាល់ដល់ភ្នែក
ការសម្លឹងអេក្រង់យូរ ធ្វើឱ្យភ្នែកនឿយហត់ ស្ងួត ក្រហាយ ឬមានអារម្មណ៍ដូចមានអ្វីចូលភ្នែក។ ការមើលជាប់ៗគ្នាដោយមិនសម្រាក ក៏អាចបង្កើនបញ្ហាភ្នែកបានផងដែរ។
បង្កបញ្ហាសាច់ដុំ និងឆ្អឹង
ការអង្គុយ ឬដេកមើលរឿងក្នុងឥរិយាបថដដែលយូរ អាចធ្វើឱ្យក និងខ្នងតឹង ឈឺស្មា ឈឺចង្កេះ ឬស្ពឹកដៃជើង។ ការខ្វះចលនារយៈពេលយូរ ក៏មិនល្អចំពោះសុខភាពទូទៅដែរ។
រំខានដល់ការគេង
ការមើលអេក្រង់នៅពេលយប់ ជាពិសេសរហូតដល់យប់ជ្រៅ អាចរំខានដល់ចង្វាក់ជីវសាស្ត្រ និងធ្វើឱ្យពិបាកចូលគេង ឬគេងមិនមានគុណភាព។ ការគេងមិនគ្រប់ជាប្រចាំ អាចធ្វើឱ្យរាងកាយ និងខួរក្បាលមិនអាចស្តារខ្លួនបានល្អ។
ប៉ះពាល់ដល់អារម្មណ៍ និងជីវិតប្រចាំថ្ងៃ
ការជក់ចិត្តនឹងការមើលរឿងខ្លាំងពេក អាចធ្វើឱ្យកាត់បន្ថយការទំនាក់ទំនងជាមួយមនុស្សជុំវិញ ខ្វះការផ្តោតអារម្មណ៍ និងប៉ះពាល់ដល់ការងារ ឬការសិក្សា។ ប្រសិនបើមិនមើលមិនបាន ឬការមើលរឿងចាប់ផ្តើមរំខានដល់ជីវិតប្រចាំថ្ងៃ នោះគួរយកចិត្តទុកដាក់ជាពិសេស។
ដើម្បីកាត់បន្ថយផលប៉ះពាល់ គួរកំណត់ពេលមើលរឿងឱ្យច្បាស់ សម្រាកភ្នែកជាប្រចាំ ងើបដើរ និងផ្លាស់ប្តូរឥរិយាបថ កាត់បន្ថយការប្រើអេក្រង់មុនចូលគេង ហើយចំណាយពេលធ្វើសកម្មភាពក្រៅផ្ទះ ឬជួបជុំជាមួយមនុស្សជុំវិញ។
ការមើលរឿងមិនមែនជាបញ្ហាទេ ប៉ុន្តែការមើលជាប់ៗគ្នាដោយបាត់បង់ការគ្រប់គ្រងពេលវេលា អាចក្លាយជាទម្លាប់ដែលប៉ះពាល់ដល់សុខភាពបាន៕