យោងតាមការចុះផ្សាយពីប្រភពបរទេស ការរត់បានឆ្ងាយ មិនមែនអាស្រ័យលើការបង្ខំខ្លួនឱ្យរត់លឿននោះទេ ប៉ុន្តែត្រូវបង្កើនសមត្ថភាពរាងកាយបន្តិចម្តងៗ និងហ្វឹកហាត់ឱ្យបានត្រឹមត្រូវ។
ចាប់ផ្តើមដោយរត់ក្នុងល្បឿនដែលអាចនិយាយជាប្រយោគបានដោយមិនហត់ខ្លាំង ព្រោះការរត់យឺតជួយបង្កើតមូលដ្ឋានប្រព័ន្ធបេះដូង និងសួតឱ្យរឹងមាំ។ អ្នកចាប់ផ្តើមក៏អាចប្រើវិធីរត់ស្របជាមួយដើរ ដូចជា រត់ ៣ នាទី បន្ទាប់មកដើរលឿន ១ នាទី ហើយបង្កើនពេលរត់បន្តិចម្តងៗនៅពេលរាងកាយស៊ាំ។
គួរយកចិត្តទុកដាក់លើជំហានរត់ ដោយជៀសវាងការបោះជំហានវែងពេក និងរក្សាចលនាឱ្យមានភាពធម្មជាតិ។ ការគ្រប់គ្រងដង្ហើមឱ្យស្មើ និងជ្រៅ ក៏អាចជួយឱ្យរត់បានយូរជាងមុនដោយមិនងាយហត់។
ក្រៅពីការរត់ គួរហាត់កម្លាំងសាច់ដុំ ១–២ ថ្ងៃក្នុងមួយសប្តាហ៍ ដោយផ្តោតលើសាច់ដុំជើង និងស្នូលរាងកាយ ដើម្បីជួយរក្សាទម្រង់រត់ និងកាត់បន្ថយហានិភ័យរបួស។
សំខាន់បំផុត គឺកុំបង្កើនចម្ងាយរត់លឿនពេក។ គួរបង្កើនបន្តិចម្តងៗ និងទុកពេលឱ្យសាច់ដុំ សរសៃពួរ និងសន្លាក់សម្របខ្លួន។ ការគេងឱ្យគ្រប់គ្រាន់ ផឹកទឹកសមរម្យ និងទទួលទានអាហារមានជីវជាតិ ក៏ជាផ្នែកសំខាន់នៃការបង្កើនកម្លាំងអត់ធ្មត់ផងដែរ។
ការរត់ឱ្យបានឆ្ងាយមិនអាចសម្រេចបានក្នុងរយៈពេលខ្លីទេ។ ការហ្វឹកហាត់ជាប្រចាំ បង្កើនសមត្ថភាពបន្តិចម្តងៗ និងស្តាប់សញ្ញាពីរាងកាយ នឹងជួយឱ្យការរត់កាន់តែងាយស្រួល និងមានសុវត្ថិភាព៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕