យោងតាមការចុះផ្សាយពីប្រភពបរទេស ការខាំទឹកកកក្រោយពេលផឹកភេសជ្ជៈត្រជាក់ អាចធ្វើឱ្យមានអារម្មណ៍ស្រស់ស្រាយ និងជួយបន្ធូរអារម្មណ៍ ប៉ុន្តែបើធ្វើជាទម្លាប់ជាប្រចាំ អាចបង្កបញ្ហាដល់ធ្មេញ និងថ្គាម ហើយប៉ះពាល់ដល់រូបរាងមុខដោយប្រយោល។
ធ្មេញអាចសឹក បាក់ ឬប្រេះ
ទឹកកកមានភាពរឹងខ្លាំង ហើយការខាំជាបន្តបន្ទាប់ធ្វើឱ្យធ្មេញទទួលសម្ពាធខ្លាំង អាចបណ្តាលឱ្យស្រទាប់ការពារធ្មេញសឹក ធ្មេញបាក់ ប្រេះ ឬងាយឈឺពេលប៉ះត្រជាក់។ នៅពេលធ្មេញខូច ស្នាមញញឹមក៏អាចមើលទៅមិនស្រស់ស្អាតដូចមុន។
ថ្គាមអាចធ្វើការខ្លាំងពេក
ការខាំទឹកកកត្រូវការកម្លាំងច្រើនជាងការទំពារអាហារធម្មតា។ ប្រសិនបើធ្វើញឹកញាប់ អាចបណ្តាលឱ្យឈឺថ្គាម ឈឺក្បាល ឬធ្វើឱ្យសាច់ដុំថ្គាមរឹង និងធំជាងមុន ដែលអាចធ្វើឱ្យទម្រង់មុខមើលទៅរឹង ឬធំជាងធម្មតា។
អាចបំផ្លាញធ្មេញដែលបានព្យាបាល
អ្នកដែលមានធ្មេញបំពេញ ស្រោបធ្មេញ ឬសម្ភារៈជួសជុលធ្មេញផ្សេងៗ គួរជៀសវាងការខាំទឹកកក ព្រោះកម្លាំងប៉ះទង្គិចអាចធ្វើឱ្យសម្ភារៈប្រេះ បាក់ ឬរបូត។
ជាទូទៅ មិនមានភស្តុតាងថា ការខាំទឹកកកធ្វើឱ្យស្បែកជ្រីវជ្រួញ ឬមុខចាស់ដោយផ្ទាល់ទេ ប៉ុន្តែការខាំជាប្រចាំអាចបង្កការខូចខាតដល់ធ្មេញ និងថ្គាម ដែលអាចប៉ះពាល់ដល់ស្នាមញញឹម និងរូបរាងមុខក្នុងរយៈពេលវែង។
បើចង់បានអារម្មណ៍ត្រជាក់ គួរផឹកទឹកត្រជាក់ ជ្រើសរើសផ្លែឈើត្រជាក់ដែលមានសាច់ទន់ ឬប្រើស្ករកៅស៊ូគ្មានស្ករក្នុងបរិមាណសមរម្យ ជំនួសការខាំទឹកកក៕