យោងតាមការចុះផ្សាយពីប្រភពបរទេស ការដើរចេញក្រៅក្រោមថ្ងៃក្តៅយូរ ធ្វើឱ្យរាងកាយបាត់បង់ទឹក និងអេឡិចត្រូលីត ព្រមទាំងធ្វើឱ្យសរសៃឈាមនៅលើស្បែករីក ដើម្បីបញ្ចេញកម្ដៅ។ ដូច្នេះ បើទើបត្រឡប់មកផ្ទះហើយអង្គុយជិតកង្ហារដែលបក់ខ្លាំង ឬចូលបន្ទប់ម៉ាស៊ីនត្រជាក់ដែលត្រជាក់ខ្លាំងភ្លាមៗ អាចធ្វើឱ្យរាងកាយប្តូរសីតុណ្ហភាពយ៉ាងឆាប់រហ័ស និងប៉ះពាល់ដល់ចរន្តឈាម ជាពិសេសចំពោះមនុស្សចាស់ អ្នកមានជំងឺលើសឈាម ឬជំងឺបេះដូង។
អ្នកជំនាញណែនាំថា បន្ទាប់ពីត្រឡប់ពីក្រៅថ្ងៃក្តៅ គួរចូលសម្រាកនៅកន្លែងមានខ្យល់ចេញចូលល្អ និងឱ្យរាងកាយត្រជាក់បន្តិចម្តងៗ។ អាចសម្រាកប្រហែល ២០–៣០នាទី ជូតញើស និងផឹកទឹកឱ្យបានគ្រប់គ្រាន់ មុនពេលចូលបន្ទប់ម៉ាស៊ីនត្រជាក់។
បើប្រើកង្ហារ គួរប្រើល្បឿនសមរម្យ និងជៀសវាងបក់ខ្យល់ខ្លាំងចំក្បាល មុខ ឬក។ ចំពោះម៉ាស៊ីនត្រជាក់ គួរជៀសវាងកំណត់សីតុណ្ហភាពទាបពេកភ្លាមៗ ហើយអាចកំណត់ប្រហែល ២៥–២៦អង្សាសេ ដើម្បីឱ្យរាងកាយសម្របខ្លួនបានងាយ។
ប្រសិនបើក្រោយត្រឡប់ពីក្រៅថ្ងៃក្តៅ មានរោគសញ្ញាដូចជា មាត់វៀច ដៃឬជើងម្ខាងខ្សោយ ឬស្ពឹក និយាយមិនច្បាស់ មើលមិនច្បាស់ បាត់លំនឹង ឈឺក្បាលខ្លាំង ឬសន្លប់ ត្រូវប្រញាប់ទៅមន្ទីរពេទ្យ ឬស្វែងរកសេវាសង្គ្រោះបន្ទាន់ភ្លាមៗ ព្រោះអាចជាសញ្ញានៃជំងឺដាច់សរសៃឈាមខួរក្បាល។
ចំណុចសំខាន់ គឺកុំប្រញាប់ធ្វើឱ្យរាងកាយត្រជាក់ខ្លាំងពេក បន្ទាប់ពីស្ថិតនៅក្រោមថ្ងៃក្តៅ។ ឱ្យរាងកាយមានពេលសម្របខ្លួនបន្តិចម្តងៗ និងបំពេញជាតិទឹកឱ្យបានគ្រប់គ្រាន់៕