យោងតាមការចុះផ្សាយពីប្រភពបរទេស មនុស្សជាច្រើនយល់ថា ការឱ្យកុមារផឹកទឹកដោះគោដែលសម្បូរកាល់ស្យូម អាចធ្វើឱ្យលូតកម្ពស់បានល្អជាងមុន។ ប៉ុន្តែតាមអ្នកជំនាញ ទឹកដោះគោតែមួយមុខមិនអាចកំណត់កម្ពស់របស់កុមារបានទេ ហើយការបង្ខំឱ្យកុមារផឹកច្រើនពេក ទោះបីទទួលបានកាល់ស្យូម និងថាមពលគ្រប់គ្រាន់ហើយ ក៏អាចធ្វើឱ្យបាត់ចំណង់អាហារ និងបង្កភាពតានតឹងផ្លូវចិត្តបាន។
កម្ពស់របស់កុមារត្រូវបានជះឥទ្ធិពលដោយកត្តាជាច្រើន ដូចជា ហ្សែន កម្ពស់របស់ឪពុកម្តាយ អាហារូបត្ថម្ភ សុខភាព និងសកម្មភាពរាងកាយ។ កុមារដែលទទួលបានអាហារូបត្ថម្ភគ្រប់គ្រាន់ មានសុខភាពល្អ និងធ្វើសកម្មភាពរាងកាយជាប្រចាំ មានឱកាសអភិវឌ្ឍរាងកាយបានល្អ។
ការធ្វើសកម្មភាពរាងកាយជាប្រចាំក៏អាចជួយជំរុញការលូតលាស់របស់ឆ្អឹងផងដែរ។ ដូច្នេះ ឪពុកម្តាយគួរផ្តោតលើ របបអាហារមានតុល្យភាព ការហាត់ប្រាណ ការថែទាំសុខភាព និងការតាមដានទម្ងន់និងកម្ពស់របស់កូនជាប្រចាំ ជាជាងពឹងផ្អែកលើទឹកដោះគោតែមួយមុខ៕