យោងតាមការចុះផ្សាយពីប្រភពបរទេស បើអ្នកមិនសូវមានពេល ឬមិនចូលចិត្តទៅហាត់ប្រាណ ការងារផ្ទះប្រចាំថ្ងៃក៏អាចជួយឱ្យរាងកាយសកម្ម និងដុតកាឡូរីបានផងដែរ។ ការបោសផ្ទះ ជូតផ្ទះ លាងចាន ឬរៀបចំផ្ទះ មិនត្រឹមតែធ្វើឱ្យផ្ទះស្អាតប៉ុណ្ណោះទេ ប៉ុន្តែថែមទាំងជួយឱ្យសាច់ដុំធ្វើចលនា និងប្រើប្រាស់ថាមពល។
ការងារផ្ទះដែលអាចជួយដុតកាឡូរីក្នុងរយៈពេលប្រហែល ១ ម៉ោង រួមមាន លាងចានប្រហែល ៦៣ កាឡូរី រៀបចំគ្រែប្រហែល ១៣៥ កាឡូរី បោស និងជូតផ្ទះប្រហែល ២៥០ កាឡូរី លាងបន្ទប់ទឹកប្រហែល ២៥០ កាឡូរី អ៊ុតខោអាវប្រហែល ២៩០ កាឡូរី និងកាត់ស្មៅ ឬធ្វើសួនច្បារប្រហែល ៤០០ កាឡូរី។
ទោះជាយ៉ាងណា អ្នកជំនាញបញ្ជាក់ថា ការងារផ្ទះមិនអាចជំនួសការហាត់ប្រាណបានទាំងស្រុងនោះទេ។ ប្រសិនបើចង់សម្រកទម្ងន់ឱ្យមានប្រសិទ្ធភាព គួររួមបញ្ចូលរបបអាហារមានតុល្យភាព គ្រប់គ្រងបរិមាណកាឡូរី គេងឱ្យបានគ្រប់គ្រាន់ និងធ្វើសកម្មភាពរាងកាយជាប្រចាំ។
សរុបមក ការធ្វើការងារផ្ទះជាប្រចាំ គឺជាវិធីសាមញ្ញមួយដែលអាចជួយបង្កើនការប្រើប្រាស់ថាមពល និងគាំទ្រដល់ការគ្រប់គ្រងទម្ងន់ ជាពិសេសសម្រាប់អ្នកដែលមិនសូវមានពេលហាត់ប្រាណ៕