យោងតាមការចុះផ្សាយពីប្រភពបរទេស មនុស្សជាច្រើនធ្លាប់ជួបស្ថានភាព “រាងកាយហត់ ប៉ុន្តែខួរក្បាលមិនព្រមសម្រាក” ដោយនៅពេលថ្ងៃធ្វើការហត់នឿយខ្លាំង តែពេលដេកបែរជាគិតច្រើន ពិបាកគេង ឬភ្ញាក់កណ្តាលយប់។ អាការៈនេះត្រូវបានគេហៅថា Tired but Wired ដែលមានន័យថា រាងកាយអស់កម្លាំង ប៉ុន្តែខួរក្បាលនៅតែសកម្ម។
អាការៈនេះមិនមែនជាជំងឺជាក់លាក់ទេ ប៉ុន្តែជាបញ្ហាដែលជួបញឹកញាប់ក្នុងចំណោមមនុស្សធ្វើការ ដែលមានភាពតានតឹងប្រចាំថ្ងៃ គេងមិនគ្រប់ ឬមានទម្លាប់រំខានដល់វដ្តនៃការគេង។
មូលហេតុសំខាន់មួយគឺការប្រែប្រួលអ័រម៉ូនដែលគ្រប់គ្រងការគេង ដូចជា Cortisol (អ័រម៉ូនជួយឱ្យរាងកាយភ្ញាក់ និងឆ្លើយតបនឹងស្ត្រេស) និង Melatonin (អ័រម៉ូនជួយឱ្យរាងកាយមានអារម្មណ៍ងងុយគេង)។ នៅពេលមានភាពតានតឹងយូរ ឬរបៀបរស់នៅមិនទៀងទាត់ អ័រម៉ូនទាំងនេះអាចដំណើរការមិនសម្របគ្នា ធ្វើឱ្យរាងកាយចង់សម្រាក ប៉ុន្តែខួរក្បាលនៅតែភ្ញាក់។
កត្តាដែលអាចបង្កឱ្យមានអាការៈនេះ រួមមាន ភាពតានតឹងពីការងារ ការប្រើទូរស័ព្ទ ឬអេក្រង់មុនចូលគេង ការផឹកកាហ្វេ ឬភេសជ្ជៈមានកាហ្វេអ៊ីនពេលរសៀល និងល្ងាច ការចូលគេងយឺត មិនទៀងទាត់ ការញ៉ាំផ្អែមច្រើន ឬហាត់ប្រាណខ្លាំងជិតពេលចូលគេង។
សញ្ញាដែលអាចសម្គាល់បានមានដូចជា ងងុយគេងតែគេងមិនលក់ ភ្ញាក់កណ្តាលយប់ហើយពិបាកគេងវិញ ព្រឹកឡើងហត់ ប៉ុន្តែពេលយប់បែរជាមានថាមពល ការគិតយឺត ខ្វះការផ្តោតអារម្មណ៍ និងចង់ញ៉ាំអាហារផ្អែមញឹកញាប់។
ដើម្បីកែលម្អការគេង អ្នកជំនាញណែនាំឱ្យបិទទូរស័ព្ទ ឬឧបករណ៍អេឡិចត្រូនិកមុនចូលគេងយ៉ាងហោចណាស់ ១ ម៉ោង ជៀសវាងកាហ្វេអ៊ីនពេលរសៀល និងល្ងាច ញ៉ាំអាហារពេលល្ងាចមានតុល្យភាព ហាត់ដកដង្ហើម ឬធ្វើសមាធិ ទទួលពន្លឺព្រះអាទិត្យពេលព្រឹក និងរក្សាម៉ោងចូលគេង-ភ្ញាក់ឱ្យទៀងទាត់។
ប្រសិនបើមានបញ្ហាគេងមិនលក់បន្តលើសពី ៣ ខែ មានភាពងងុយខ្លាំងពេលថ្ងៃ ឬប៉ះពាល់ដល់ការងារ និងជីវិតប្រចាំថ្ងៃ គួរពិគ្រោះជាមួយវេជ្ជបណ្ឌិត ដើម្បីរកមូលហេតុពិតប្រាកដ។
សរុបមក Tired but Wired គឺជាស្ថានភាពដែលរាងកាយហត់ ប៉ុន្តែខួរក្បាលនៅតែសកម្ម ដែលភាគច្រើនពាក់ព័ន្ធនឹងស្ត្រេស ទម្លាប់លេងទូរស័ព្ទ និងរបៀបគេងមិនល្អ។ ការកែប្រែទម្លាប់ប្រចាំថ្ងៃ អាចជួយឱ្យគុណភាពនៃការគេងប្រសើរឡើងវិញ៕