យោងតាមការចុះផ្សាយពីប្រភពបរទេស បញ្ហាខ្សោយសមត្ថភាពផ្លូវភេទ មិនមែនពាក់ព័ន្ធតែរឿងផ្លូវភេទប៉ុណ្ណោះទេ ប៉ុន្តែអាចជាសញ្ញាបង្ហាញពីបញ្ហាសរសៃឈាម ឬការថយចុះអ័រម៉ូនបុរស។ អ្នកជំនាញណែនាំថា ការកែប្រែរបបអាហារអាចជួយទ្រទ្រង់លំហូរឈាម និងសុខភាពបុរសតាមធម្មជាតិ។
អាហារដែលគួរបន្ថែមក្នុងរបបអាហាររួមមាន បន្លែស្លឹកបៃតង និងមើមយ៉េន ដែលជួយពង្រីកសរសៃឈាម គ្រាប់ធញ្ញជាតិដូចជា អាល់ម៉ុន វ៉ាល់ណាត់ និងគ្រាប់រីករាយ ដែលមាន L-arginine ជួយសម្រួលលំហូរឈាម ផ្លែបឺដែលសម្បូរខ្លាញ់ល្អ និងសារធាតុចិញ្ចឹមជួយទ្រទ្រង់ការផលិតអ័រម៉ូនបុរស និងត្រីសមុទ្រដែលមានអូមេហ្គា-៣ ដូចជា ត្រីសាល់ម៉ុន និងត្រីម៉ាកឺរែល ដែលជួយថែរក្សាសុខភាពសរសៃឈាម។
ក្រៅពីនេះ សូកូឡាខ្មៅដែលមានកាកាវចាប់ពី ៧០% ឡើងទៅ អាចជួយរក្សាភាពបត់បែនរបស់សរសៃឈាម ប្រសិនបើទទួលទានក្នុងបរិមាណសមរម្យ។ ចំណែកអយស្ទ័រ ឬខ្យងសមុទ្រ មានសារធាតុស័ង្កសីខ្ពស់ ដែលចាំបាច់សម្រាប់ការផលិតអ័រម៉ូនបុរស និងសុខភាពប្រព័ន្ធបន្តពូជ។
ទោះជាយ៉ាងណា ប្រសិនបើបញ្ហាខ្សោយសមត្ថភាពផ្លូវភេទបន្តលើសពី ៣ ខែ ឬបាត់បង់ការឡើងរឹងនៅពេលព្រឹក ជាពិសេសអ្នកដែលមានជំងឺទឹកនោមផ្អែម លើសឈាម ឬខ្លាញ់ក្នុងឈាមខ្ពស់ គួរទៅពិនិត្យជាមួយវេជ្ជបណ្ឌិត ព្រោះវាអាចជាសញ្ញាព្រមានពីបញ្ហាសរសៃឈាមបេះដូង។
សរុបមក ការថែរក្សាសុខភាពបុរស គួររួមបញ្ចូលរបបអាហារមានតុល្យភាព ការហាត់ប្រាណទៀងទាត់ ការគេងឱ្យបានគ្រប់គ្រាន់ និងកាត់បន្ថយការទទួលទានគ្រឿងស្រវឹង ដើម្បីជួយឱ្យរាងកាយរឹងមាំ និងមានសុខភាពល្អក្នុងរយៈពេលវែង៕