យោងតាមការចុះផ្សាយពីប្រភពបរទេស គ្រឿងអលង្ការជាវត្ថុដែលប៉ះផ្ទាល់ជាមួយស្បែកជារៀងរាល់ថ្ងៃ ដូច្នេះការជ្រើសរើសផលិតផលដែលមានប្រភពច្បាស់លាស់ គឺមានសារៈសំខាន់ចំពោះសុខភាព។
អ្នកជំនាញព្រមានថា គ្រឿងអលង្ការគ្មានប្រភពច្បាស់លាស់ ឬមានតម្លៃថោកខ្លាំង អាចមានលោហៈធ្ងន់ ឬសារធាតុបង្កអាលែកហ្ស៊ី ដូចជា នីកែល កូបាល់ និងក្រូម ដែលអាចបង្កឱ្យរមាស់ ក្រហមស្បែក ឬរលាក ជាពិសេសចំពោះអ្នកដែលមានស្បែកងាយប្រតិកម្ម។ ចំណែកគ្រឿងអលង្ការប្រភេទ «ថ្មថាមពល» ក៏មិនទាន់មានភស្តុតាងវិទ្យាសាស្ត្រគ្រប់គ្រាន់ថា អាចព្យាបាលជំងឺ ឬផ្តល់អត្ថប្រយោជន៍សុខភាពដូចការផ្សព្វផ្សាយនោះទេ។
ដើម្បីប្រើប្រាស់ដោយសុវត្ថិភាព អ្នកជំនាញណែនាំឱ្យជ្រើសរើសគ្រឿងអលង្ការដែលមានប្រភព និងគុណភាពច្បាស់លាស់ សម្អាតវាជាប្រចាំ និងដោះចេញនៅពេលងូតទឹក ហែលទឹក ហាត់ប្រាណ ឬគេង។ សម្រាប់អ្នកដែលមានស្បែកងាយប្រតិកម្ម គួរសាកពាក់ក្នុងរយៈពេលខ្លីជាមុន និងជៀសវាងគ្រឿងអលង្ការដែលតឹងពេក៕