យោងតាមការចុះផ្សាយពីប្រភពរទេស តម្រងនោមជាសរីរាង្គសំខាន់ដែលមានតួនាទីចម្រោះសារធាតុកខ្វក់ចេញពីរាងកាយ និងរក្សាតុល្យភាពទឹកក្នុងខ្លួន។ ប៉ុន្តែទម្លាប់ប្រចាំថ្ងៃមួយចំនួនដែលមនុស្សជាច្រើនធ្វើជាប្រចាំ អាចបង្កផលប៉ះពាល់ដល់តម្រងនោមដោយមិនដឹងខ្លួន។
មនុស្សជាច្រើន ជាពិសេសបុរស តែងមានការយល់ច្រឡំថា ការរួមភេទញឹកញាប់អាចធ្វើឱ្យតម្រងនោមខ្សោយ ឬបណ្តាលឱ្យកើតជំងឺខ្សោយតម្រងនោម។ ប៉ុន្តែអ្នកជំនាញវេជ្ជសាស្ត្របញ្ជាក់ថា ការរួមភេទក្នុងកម្រិតសមរម្យ មិនមែនជាមូលហេតុផ្ទាល់ដែលធ្វើឱ្យតម្រងនោមខូចនោះទេ។
អាការៈដូចជា នឿយហត់ ឈឺខ្នង ឬមិនស្រួលខ្លួនក្រោយពេលរួមភេទខ្លាំងពេក ភាគច្រើនអាចពាក់ព័ន្ធនឹងការខ្វះការសម្រាក ខ្វះទឹក ការផឹកស្រា ឬរាងកាយហត់នឿយ។ ផ្ទុយទៅវិញ ទម្លាប់ប្រចាំថ្ងៃខាងក្រោមនេះទើបជាកត្តាដែលអាចប៉ះពាល់ដល់សុខភាពតម្រងនោមយូរអង្វែង។
១. ទប់នោមញឹកញាប់
ការទប់នោមយូរ អាចបង្កើនសម្ពាធក្នុងប្លោកនោម និងបង្កលក្ខខណ្ឌឱ្យមេរោគកើនឡើង។ ប្រសិនបើទម្លាប់នេះកើតឡើងជាបន្តបន្ទាប់ អាចបង្កើនហានិភ័យនៃការរលាកផ្លូវទឹកនោម រលាកតម្រងនោម និងប៉ះពាល់ដល់មុខងាររបស់តម្រងនោម។
២. ផឹកទឹកតិចពេក
ការខ្វះទឹកធ្វើឱ្យទឹកនោមមានភាពខាប់ជាងមុន ធ្វើឱ្យតម្រងនោមត្រូវធ្វើការខ្លាំងក្នុងការចម្រោះសារធាតុសំណល់។ ទម្លាប់នេះអាចបង្កើនហានិភ័យកើតគ្រួសក្នុងតម្រងនោម និងការឆ្លងមេរោគផ្លូវទឹកនោម។
៣. ញ៉ាំអាហារប្រៃខ្លាំង សាច់ច្រើន និងផឹកស្រាញឹកញាប់
ការទទួលទានអំបិលច្រើនអាចបង្កើនសម្ពាធឈាម ដែលជាកត្តាមួយនៃជំងឺតម្រងនោមរ៉ាំរ៉ៃ។ ចំណែកការញ៉ាំអាហារមានប្រូតេអ៊ីនខ្ពស់ ដូចជា សាច់ក្រហម គ្រឿងក្នុងសត្វ និងការផឹកស្រាជាញឹកញាប់ អាចបង្កើនកម្រិតអាស៊ីតអ៊ុយរិច ដែលអាចបង្កការកកកុញនៅក្នុងតម្រងនោម។
៤. ប្រើថ្នាំបំបាត់ការឈឺចាប់ និងអាហារបំប៉នដោយខ្លួនឯង
ការប្រើថ្នាំមួយចំនួនរយៈពេលយូរ ដោយគ្មានការណែនាំពីគ្រូពេទ្យ អាចប៉ះពាល់ដល់លំហូរឈាមទៅកាន់តម្រងនោម និងបង្កការខូចខាតដល់មុខងាររបស់វា។
ក្រៅពីនេះ ផលិតផលបំប៉ន ឬថ្នាំដែលផ្សព្វផ្សាយថា “ជួយបំប៉នតម្រងនោម” ប៉ុន្តែមិនមានប្រភពច្បាស់លាស់ ក៏អាចមានហានិភ័យដល់សុខភាពផងដែរ។
៥. គេងយប់ជ្រៅជាប្រចាំ
ការគេងមិនគ្រប់ ឬគេងតិចជាង ៦ ម៉ោងក្នុងមួយយប់រយៈពេលយូរ អាចរំខានដល់ការគ្រប់គ្រងសម្ពាធឈាម និងបង្កើនភាពតានតឹងក្នុងរាងកាយ។ ប្រសិនបើបន្តជាយូរ វាអាចប៉ះពាល់ដល់សរសៃឈាមតូចៗក្នុងតម្រងនោមដោយមិនបង្ហាញរោគសញ្ញាច្បាស់លាស់។
ដើម្បីការពារសុខភាពតម្រងនោម អ្នកជំនាញណែនាំឱ្យផឹកទឹកឱ្យបានគ្រប់គ្រាន់ កុំទប់នោម កាត់បន្ថយអាហារប្រៃ គ្រប់គ្រងសម្ពាធឈាម និងជាតិស្ករក្នុងឈាម គេងឱ្យបានគ្រប់ និងកុំប្រើថ្នាំ ឬអាហារបំប៉នដោយគ្មានការណែនាំពីអ្នកជំនាញ។
សញ្ញាដែលគួរប្រុងប្រយ័ត្នរួមមាន ទឹកនោមមានពពុះច្រើនជាប់ៗគ្នា ទឹកនោមមានពណ៌ខុសធម្មតា ហើមត្របកភ្នែក ឬដៃជើង និងនោមញឹកញាប់នៅពេលយប់។
សរុបមក ការខូចតម្រងនោមភាគច្រើនមិនមែនបណ្តាលមកពីការរួមភេទញឹកញាប់នោះទេ ប៉ុន្តែអាចកើតចេញពីទម្លាប់រស់នៅប្រចាំថ្ងៃដែលមនុស្សជាច្រើនមើលរំលង៕