យោងតាមការចុះផ្សាយពីប្រភពបរទេស ការសម្រកទម្ងន់មិនចាំបាច់ត្រូវអត់អាហារ ឬហាត់ប្រាណខ្លាំងរហូតអស់កម្លាំងនោះទេ។ អ្នកជំនាញផ្នែកអាហារូបត្ថម្ភណែនាំថា ការសម្រកទម្ងន់គួរធ្វើបន្តិចម្តងៗ និងរក្សាតុល្យភាពរវាងរបបអាហារ និងការហាត់ប្រាណ ដើម្បីទទួលបានលទ្ធផលប្រកបដោយសុវត្ថិភាព។
១. កុំរំលងអាហារ
ការកាត់បន្ថយកាឡូរីមិនមានន័យថាត្រូវអត់បាយ ឬរំលងអាហារនោះទេ។ វិធីល្អគឺកាត់បន្ថយបរិមាណអាហារ និងជ្រើសរើសអាហារដែលមានកាឡូរីទាប ដើម្បីជៀសវាងការអស់កម្លាំង។
២. បង្កើនជាតិសរសៃ និងប្រូតេអ៊ីន
បន្លែ ផ្លែឈើ និងគ្រាប់ធញ្ញជាតិជួយឱ្យឆ្អែតបានយូរ ខណៈប្រូតេអ៊ីនពីសាច់ស ស៊ុត សណ្តែក និងគ្រាប់ធញ្ញជាតិជួយរក្សាសាច់ដុំ និងកាត់បន្ថយការឃ្លាន។ គួរជ្រើសរើសកាបូអ៊ីដ្រាតដែលស្រូបយកយឺត ដូចជាអង្ករសំរូប និងធញ្ញជាតិពេញគ្រាប់។
៣. សម្រកទម្ងន់បន្តិចម្តងៗ
ការសម្រកទម្ងន់លឿនពេកអាចធ្វើឱ្យរាងកាយអស់កម្លាំង និងស្បែកបាត់បង់ភាពតឹងណែន។ កុំភ្លេចទទួលទានខ្លាញ់ល្អពីត្រី គ្រាប់ធញ្ញជាតិ និងប្រេងអូលីវ ដើម្បីជួយថែរក្សាសុខភាពស្បែក។
៤. ផឹកទឹកឱ្យគ្រប់គ្រាន់
គួរផឹកទឹកប្រហែល ២ លីត្រក្នុងមួយថ្ងៃ ដើម្បីជួយដល់ការរំលាយអាហារ បំពេញជាតិទឹកដែលបាត់បង់ និងជួយកាត់បន្ថយអារម្មណ៍ឃ្លាន។
៥. ហាត់ប្រាណឱ្យសមស្រប
ជ្រើសរើសការហាត់ប្រាណដែលសមនឹងសុខភាព ដូចជា ដើរ ហែលទឹក ឬយូហ្គា ហើយបង្កើនរយៈពេល និងកម្រិតហាត់ប្រាណបន្តិចម្តងៗ ដើម្បីជៀសវាងការអស់កម្លាំង។
សម្រាប់អ្នកដែលលើសទម្ងន់ ឬធាត់ខ្លាំង គួរពិគ្រោះជាមួយវេជ្ជបណ្ឌិត ឬអ្នកជំនាញផ្នែកអាហារូបត្ថម្ភ ដើម្បីទទួលបានផែនការសម្រកទម្ងន់ដែលសមស្រប និងមានសុវត្ថិភាព៕