យោងតាមការចុះផ្សាយពីប្រភពបរទេស ឪពុកម្តាយជាច្រើនតែងបារម្ភ នៅពេលឃើញកូនមានទម្លាប់ប្លែកៗ ដូចជា ចូលចិត្តអង្គុយស្ងៀម និយាយម្នាក់ឯង សួរសំណួរច្រើន ឬធ្វើបន្ទប់រញ៉េរញ៉ៃ។ ប៉ុន្តែអ្នកជំនាញផ្នែកចិត្តវិទ្យា និងការអប់រំបង្ហាញថា ទម្លាប់ទាំងនេះអាចជាសញ្ញានៃការអភិវឌ្ឍខួរក្បាល និងសមត្ថភាពគិតបានល្អ។
១ កូនចូលចិត្តអង្គុយស្ងៀម ឬសម្លឹងគិតមួយសន្ទុះ
កុមារខ្លះមើលទៅដូចជាកំពុងស្រមើស្រមៃ ឬសម្លឹងមិនផ្តោតលើអ្វីមួយ។ តាមការសិក្សា ស្ថានភាពនេះអាចជាពេលដែលខួរក្បាលកំពុងរៀបចំព័ត៌មាន សម្រាក និងពង្រឹងការចងចាំ។ កុមារបែបនេះក៏អាចមានសមត្ថភាពផ្តោតអារម្មណ៍ និងការគិតច្នៃប្រឌិតល្អផងដែរ។
២ ចូលចិត្តនិយាយម្នាក់ឯង
ការនិយាយម្នាក់ឯងរបស់កុមារត្រូវបានគេស្គាល់ថា ជា “ការគិតចេញជាសំឡេង” ដែលជួយឱ្យកុមាររៀបចំគំនិត បង្កើនការយល់ដឹង និងពង្រឹងការចងចាំ។ អ្នកជំនាញចាត់ទុកថា វាជាផ្នែកធម្មតានៃការអភិវឌ្ឍការរៀនសូត្រ មិនមែនជាសញ្ញាបញ្ហាផ្លូវចិត្តនោះទេ។
៣ ចូលចិត្តសួរ “ហេតុអ្វី?” ជាញឹកញាប់
កុមារដែលសួរសំណួរច្រើន ជាធម្មតាមានភាពចង់ដឹងចង់ឃើញ និងចូលចិត្តយល់ដឹងពីពិភពជុំវិញខ្លួន។ អ្នកជំនាញលើកឡើងថា ការសួរសំណួរជាបន្តបន្ទាប់ ជួយអភិវឌ្ឍការគិតវិភាគ ការចងចាំ និងជំនាញដោះស្រាយបញ្ហា។ ដូច្នេះ ឪពុកម្តាយគួរព្យាយាមឆ្លើយសំណួររបស់កូន ដើម្បីជំរុញការរៀនសូត្រ។
៤ ចូលចិត្តធ្វើបន្ទប់រញ៉េរញ៉ៃ
បន្ទប់ដែលមើលទៅមិនសូវមានរបៀប មិនមែនសុទ្ធតែជារឿងអាក្រក់ទេ។ ការស្រាវជ្រាវមួយបានបង្ហាញថា បរិយាកាសដែលមានវត្ថុចម្រុះអាចជំរុញការភ្ញោចអារម្មណ៍ និងការបង្កើតទំនាក់ទំនងរវាងកោសិកាខួរក្បាល ដែលជួយលើកកម្ពស់ការគិតច្នៃប្រឌិត។ ទោះជាយ៉ាងណា ឪពុកម្តាយគួរបង្រៀនកូនឱ្យចេះរៀបចំសម្ភារៈវិញ បន្ទាប់ពីលេងរួច។
សរុបមក ទម្លាប់ទាំងនេះមិនមែនមានន័យថា កុមារគ្រប់រូបនឹងមានភាពឆ្លាតវៃខ្ពស់នោះទេ ប៉ុន្តែវាអាចជាសញ្ញាបង្ហាញពីការអភិវឌ្ឍខួរក្បាល និងការរៀនសូត្រតាមបែបធម្មជាតិ។ ឪពុកម្តាយគួរសង្កេត និងលើកទឹកចិត្តកូនឱ្យរៀនសូត្រក្នុងបរិយាកាសដែលមានសុវត្ថិភាព និងសមស្រប ជាជាងប្រញាប់វិនិច្ឆ័យថាទម្លាប់ទាំងនេះជាបញ្ហា៕