យោងតាមការចុះផ្សាយពីប្រភពបរទេស មនុស្សជាច្រើនមានទម្លាប់គេងក្នុងទម្រង់ដែលខ្លួនស្រួល ប៉ុន្តែអ្នកជំនាញផ្នែកប្រព័ន្ធទឹកនោមបានព្រមានថា ការគេងផ្កាប់មុខជាប្រចាំរយៈពេលយូរ អាចបង្កផលប៉ះពាល់ដល់គុណភាពការគេង និងសុខភាពផ្លូវភេទរបស់បុរស។
ទោះបីការគេងផ្កាប់មុខមិនបំផ្លាញមេជីវិតឈ្មោលដោយផ្ទាល់ក៏ដោយ ប៉ុន្តែវាអាចប៉ះពាល់ដល់ចរន្តឈាម និងធ្វើឱ្យតំបន់ពោះក្រោម និងអង្គជាតិភេទត្រូវបានសង្កត់ជាប់យូរ ដែលអាចបង្កភាពមិនស្រួល និងរំខានដល់ការគេង។
ការគេងផ្កាប់មុខអាចធ្វើឱ្យអង្គជាតិភេទត្រូវសង្កត់នៅពេលយប់ ខណៈបុរសអាចមានការឡើងរឹងតាមធម្មជាតិពេលគេង។ សម្ពាធនេះអាចធ្វើឱ្យរាងកាយត្រូវផ្លាស់ទីញឹកញាប់ និងបន្ថយគុណភាពនៃការគេង។
លើសពីនេះ ការគេងមិនបានជ្រៅគ្រប់គ្រាន់អាចប៉ះពាល់ដល់ការផលិតអ័រម៉ូនភេទបុរស តេស្ដេរ៉ូនដែលមានទំនាក់ទំនងជាមួយចំណង់ផ្លូវភេទ និងសមត្ថភាពផ្លូវភេទទូទៅ។
អ្នកជំនាញក៏បញ្ជាក់ថា ពងស្វាសត្រូវការសីតុណ្ហភាពទាបជាងសីតុណ្ហភាពរាងកាយបន្តិច ដើម្បីផលិតមេជីវិតឈ្មោលបានល្អ។ ការគេងផ្កាប់មុខអាចធ្វើឱ្យតំបន់នេះក្តៅ និងមានសម្ពាធកើនឡើង ដែលអាចប៉ះពាល់ដល់គុណភាព និងចំនួនមេជីវិតឈ្មោលនៅរយៈពេលវែង។
អ្នកជំនាញណែនាំថា ទម្រង់គេងដែលល្អជាងគេគឺ គេងផ្អៀង ព្រោះអាចកាត់បន្ថយការសង្កត់លើរាងកាយ និងអនុញ្ញាតឱ្យអង្គជាតិភេទស្ថិតក្នុងទីតាំងធម្មជាតិ។ ការគេងផ្ងារក៏អាចជាជម្រើសមួយបានដែរ ប៉ុន្តែអ្នកដែលមានបញ្ហាស្រមុកខ្លាំងគួរប្រុងប្រយ័ត្ន។
ប្រសិនបើមានរោគសញ្ញាដូចជា ការឡើងរឹងមិនពេញលេញ សមត្ថភាពថយចុះ រយៈពេលឡើងរឹងខ្លី ឬបញ្ហាឆាប់បញ្ចេញបន្តលើសពី ៣ខែ គួរទៅពិគ្រោះជាមួយវេជ្ជបណ្ឌិត ដើម្បីស្វែងរកមូលហេតុពិតប្រាកដ។
ការកែប្រែទម្រង់គេង រួមជាមួយការហាត់ប្រាណ ការគេងគ្រប់គ្រាន់ និងថែរក្សាសុខភាពទូទៅ អាចជួយគាំទ្រដល់ចរន្តឈាម និងសមត្ថភាពផ្លូវភេទរបស់បុរសបានក្នុងរយៈពេលវែង៕