យោងតាមការចុះផ្សាយពីប្រភពបរទេស ផ្លែប៉ោមជាផ្លែឈើដែលសម្បូរទៅដោយជាតិសរសៃ វីតាមីន និងសារធាតុប្រឆាំងអុកស៊ីតកម្ម ដែលអាចជួយលើកកម្ពស់សុខភាពប្រព័ន្ធរំលាយអាហារ បេះដូង និងកាត់បន្ថយហានិភ័យនៃជំងឺរ៉ាំរ៉ៃមួយចំនួន។
ផ្លែប៉ោមមធ្យមមួយផ្លែមានកាឡូរីមិនខ្ពស់ ប៉ុន្តែផ្ទុកជាតិសរសៃប្រហែល ៤,៤ក្រាម ដែលស្មើនឹងប្រហែល ១៦% នៃតម្រូវការប្រចាំថ្ងៃ ជាតិសរសៃប្រភេទ Pectin ដែលមានច្រើននៅក្នុងសម្បកផ្លែប៉ោម អាចជួយគ្រប់គ្រងកម្រិតជាតិស្ករ និងកូឡេស្តេរ៉ុលក្នុងឈាម។
ក្រៅពីនេះ ផ្លែប៉ោមក៏សម្បូរវីតាមីន C និងប៉ូតាស្យូម ដែលជួយពង្រឹងប្រព័ន្ធភាពស៊ាំ ថែរក្សាសុខភាពបេះដូង និងជួយគ្រប់គ្រងសម្ពាធឈាម វាក៏មានសារធាតុប្រឆាំងអុកស៊ីតកម្មដូចជា Quercetin Catechin និង Chlorogenic Acid ដែលអាចជួយកាត់បន្ថយការរលាក ការពារកោសិកា និងជួយគ្រប់គ្រងកម្រិតជាតិស្ករក្នុងឈាម។
ការញ៉ាំផ្លែប៉ោមជាប្រចាំ អាចជួយឱ្យប្រព័ន្ធរំលាយអាហារដំណើរការល្អ កាត់បន្ថយការទល់លាមក និងរាគ ជួយឱ្យឆ្អែតបានយូរ គាំទ្រដល់ការគ្រប់គ្រងទម្ងន់ ថែរក្សាសុខភាពបេះដូងដោយជួយបន្ថយកូឡេស្តេរ៉ុល និងការពារសរសៃឈាម ព្រមទាំងអាចជួយកាត់បន្ថយហានិភ័យជំងឺទឹកនោមផ្អែមប្រភេទទី២ និងជំងឺរ៉ាំរ៉ៃមួយចំនួន។
ទោះជាយ៉ាងណា មុនទទួលទានគួរលាងផ្លែប៉ោមឱ្យបានស្អាត ដើម្បីកាត់បន្ថយសំណល់ថ្នាំកសិកម្មដែលអាចនៅសល់លើសម្បក ហើយមិនគួរទំពារគ្រាប់ផ្លែប៉ោមក្នុងបរិមាណច្រើនទេ ព្រោះវាមានសារធាតុដែលអាចបញ្ចេញជាតិពុលនៅពេលរំលាយក្នុងរាងកាយ។
ការញ៉ាំផ្លែប៉ោមក្នុងបរិមាណសមស្រប និងរួមជាមួយរបបអាហារមានតុល្យភាព អាចជួយថែរក្សាសុខភាពរាងកាយ និងកាត់បន្ថយហានិភ័យជំងឺផ្សេងៗបានក្នុងរយៈពេលវែង៕