យោងតាមការចុះផ្សាយពីប្រភពបរទេស មនុស្សជាច្រើនយល់ថា ការសម្រកទម្ងន់ត្រូវតែអត់អាហារ ជាពិសេសមិនញ៉ាំអាហារពេលល្ងាច ប៉ុន្តែការធ្វើបែបនេះអាចធ្វើឱ្យរាងកាយខ្វះថាមពល និងឃ្លានខ្លាំងនៅពេលក្រោយ។ វិធីសម្រកទម្ងន់ដែលមានប្រសិទ្ធភាព គឺការជ្រើសរើសអាហារដែលមានប្រយោជន៍ ដូចជាបន្លែដែលមានកាឡូរីទាប ជាតិសរសៃខ្ពស់ និងមានជាតិទឹកច្រើន ដើម្បីជួយឱ្យឆ្អែតបានយូរ។
បន្លែ ៥មុខដែលសមស្របសម្រាប់អ្នកចង់គ្រប់គ្រងទម្ងន់មានដូចជា ផ្លែឃ្លោកឬត្រឡាច ដែលមានជាតិទឹកខ្ពស់ និងងាយរំលាយ តាសក់ដែលជួយកាត់បន្ថយការឃ្លានអាហារផ្អែម ឬអាហារចៀន ប្រូខូលីដែលសម្បូរជាតិសរសៃ និងវីតាមីនជួយដល់ប្រព័ន្ធរំលាយអាហារ សារាយសមុទ្រដែលមានកាឡូរីទាប និងត្រកួនដែលជួយឱ្យឆ្អែតបានយូរ។
អ្នកជំនាញបញ្ជាក់ថា ការស្រកទម្ងន់មិនមែនមានន័យថាត្រូវកាត់បន្ថយអាហារទាំងស្រុងទេ ប៉ុន្តែគួរញ៉ាំអាហារដែលមានតុល្យភាព ដោយផ្តោតលើបន្លែ និងប្រូតេអ៊ីនល្អៗ ដូចជា ត្រី តៅហ៊ូ ឬសាច់គ្មានខ្លាញ់ ព្រមទាំងកាត់បន្ថយអាហារចៀន បង្អែម និងភេសជ្ជៈមានជាតិស្ករខ្ពស់។
គួរយល់ថា គ្មានបន្លែ ឬអាហារណាមួយអាចដុតបំផ្លាញជាតិខ្លាញ់ដោយផ្ទាល់បានទេ។ ការស្រកទម្ងន់ត្រូវការការគ្រប់គ្រងបរិមាណកាឡូរីប្រចាំថ្ងៃ រួមជាមួយការហាត់ប្រាណ និងការរស់នៅមានសុខភាពល្អ។ ការបន្ថែមបន្លែទាំងនេះក្នុងរបបអាហារ អាចជួយឱ្យឆ្អែតយូរ កាត់បន្ថយការឃ្លានពេលយប់ និងជួយថែរក្សារាងបានប្រសើរឡើង៕