យោងតាមការចុះផ្សាយពីប្រភពបរទេស មនុស្សជាច្រើនចាត់ទុកកាហ្វេជាអាវុធជួយបំបាត់ភាពងងុយ ដោយសារជាតិកាហ្វេអ៊ីនអាចជួយជំរុញប្រព័ន្ធប្រសាទ និងរារាំងសារធាតុដែលបង្កឱ្យមានអារម្មណ៍ងងុយ។ ប៉ុន្តែសម្រាប់មនុស្សខ្លះ ការផឹកកាហ្វេវិញអាចធ្វើឱ្យមានអារម្មណ៍នឿយហត់ និងចង់គេងកាន់តែខ្លាំង។
មូលហេតុអាចបណ្តាលមកពីការខ្វះការគេងយូរពេក ដែលកាហ្វេអាចបំបាត់ភាពងងុយបានតែបណ្តោះអាសន្ន មិនអាចជំនួសការគេងសម្រាកបានឡើយ។ នៅពេលឥទ្ធិពលកាហ្វេអ៊ីនថយចុះ ភាពនឿយហត់ដែលសន្សំទុកអាចត្រឡប់មកវិញកាន់តែខ្លាំង។
ម្យ៉ាងទៀត កាហ្វេដែលមានជាតិស្ករច្រើន ដូចជាកាហ្វេទឹកកក ឬកាហ្វេស្រាប់ អាចធ្វើឱ្យជាតិស្ករក្នុងឈាមឡើងលឿន ហើយធ្លាក់ចុះវិញយ៉ាងឆាប់រហ័ស បង្កឱ្យមានអារម្មណ៍អស់កម្លាំង និងងងុយ។
អ្នកដែលផឹកកាហ្វេជាប្រចាំក៏អាចប្រឈមនឹងការស៊ាំនឹងកាហ្វេអ៊ីនផងដែរ ដោយរាងកាយមិនឆ្លើយតបខ្លាំងដូចមុន ធ្វើឱ្យកាហ្វេមួយពែងមិនអាចជួយឱ្យភ្ញាក់បានដូចមុន។
លើសពីនេះ ការផឹកកាហ្វេដោយមិនផឹកទឹកគ្រប់គ្រាន់ អាចធ្វើឱ្យរាងកាយខ្វះជាតិទឹកតិចតួច ដែលបង្កឱ្យមានអារម្មណ៍អស់កម្លាំង ឈឺក្បាល និងខ្សោយកម្លាំង។ ប្រសិទ្ធភាពរបស់កាហ្វេក៏អាស្រ័យលើរាងកាយមនុស្សម្នាក់ៗ និងហ្សែនផងដែរ ព្រោះមនុស្សខ្លះរំលាយកាហ្វេអ៊ីនបានលឿន ខណៈអ្នកខ្លះទៀតមានប្រតិកម្មខ្លាំង។
អ្នកជំនាញណែនាំថា មិនគួរពឹងផ្អែកលើកាហ្វេជំនួសការគេងទេ។ គួរផឹកទឹកឱ្យគ្រប់គ្រាន់ ជ្រើសរើសកាហ្វេដែលមានជាតិស្ករតិច និងផឹកនៅពេលដែលរាងកាយត្រូវការជំនួយជាងការផឹកភ្លាមៗក្រោយភ្ញាក់ពីគេង។
សរុបមក កាហ្វេអាចជួយបង្កើនភាពសកម្មបាន ប៉ុន្តែវាមិនអាចដោះស្រាយមូលហេតុពិតនៃភាពងងុយដូចជា ការគេងមិនគ្រប់គ្រាន់ ភាពតានតឹង ឬការនឿយហត់បានទេ។ ការគេងសម្រាកឱ្យបានគ្រប់គ្រាន់នៅតែជាវិធីល្អបំផុតសម្រាប់បំបាត់ភាពងងុយ៕