យោងតាមការចុះផ្សាយពីប្រភពបរទេស ដំបៅក្នុងមាត់ជាបញ្ហាសុខភាពដែលជួបញឹកញាប់ បង្កឱ្យឈឺចាប់ពេលញ៉ាំអាហារ ផឹកទឹក ឬនិយាយ។ ជាធម្មតា ដំបៅអាចជាសះស្បើយដោយខ្លួនឯងក្នុងរយៈពេល ១–២ សប្តាហ៍ ប៉ុន្តែការថែទាំត្រឹមត្រូវអាចជួយកាត់បន្ថយការឈឺចាប់ និងពន្លឿនការជាសះស្បើយ។
អ្នកជំនាញណែនាំឱ្យខ្ពុរមាត់ជាមួយទឹកអំបិលក្តៅ រក្សាអនាម័យមាត់ឱ្យបានល្អ ប្រើច្រាសដុសធ្មេញទន់ ផឹកទឹកឱ្យគ្រប់គ្រាន់ បរិភោគអាហារទន់ៗ និងជៀសវាងអាហារហឹរ ជូរ ប្រៃ អាហារក្តៅខ្លាំង ឬត្រជាក់ខ្លាំង ព្រមទាំងជៀសវាងគ្រឿងស្រវឹង និងការជក់បារី។ ការគេងឱ្យគ្រប់គ្រាន់ និងកាត់បន្ថយភាពតានតឹងក៏អាចជួយឱ្យដំបៅឆាប់ជាផងដែរ។
វេជ្ជបណ្ឌិតក៏ព្រមានថា មិនគួរប្រើថ្នាំបុរាណ ឬថ្នាំពណ៌ស្វាយលាបដំបៅដោយខ្លួនឯង ព្រោះអាចធ្វើឱ្យរលាកកាន់តែខ្លាំង និងពន្យារពេលជាសះស្បើយ។
ប្រសិនបើដំបៅមានទំហំធំ មិនជាក្នុងរយៈពេលលើសពី ២ សប្តាហ៍ កើតឡើងញឹកញាប់ ឬឈឺខ្លាំងរហូតមិនអាចញ៉ាំអាហារ ឬផឹកទឹកបាន គួរទៅពិគ្រោះជាមួយវេជ្ជបណ្ឌិត ឬទន្តបណ្ឌិត ដើម្បីរកមូលហេតុ និងទទួលការព្យាបាលសមស្រប៕