អ្នកជំនាញបង្ហាញ! អាហារ ៣ មុខក្នុងផ្ទះបាយ ជួយប្រឆាំង​ជំងឺរ៉ាំរ៉ៃ

យោងតាមការចុះផ្សាយពីប្រភពបរទេស ការរលាកជាប្រតិកម្មធម្មជាតិរបស់រាងកាយក្នុងការការពារខ្លួន ប៉ុន្តែបើកើតឡើងរ៉ាំរ៉ៃអាចបង្កើនហានិភ័យជំងឺជាច្រើន ដូចជា ជំងឺបេះដូង ទឹកនោមផ្អែម ធាត់ និងជំងឺមហារីកមួយចំនួន។ ក្រៅពីការព្យាបាលតាមវេជ្ជបញ្ជា របបអាហារដែលមានសារធាតុប្រឆាំងអុកស៊ីតកម្ម ក៏អាចជួយគាំទ្រសុខភាពបានផងដែរ។

ក្នុងចំណោមអាហារដែលត្រូវបានគេចាត់ទុកថាមានប្រយោជន៍ មាន ខ្ទឹមស ដែលមានសារធាតុ Allicin ជួយប្រឆាំងបាក់តេរី ប្រឆាំងផ្សិត និងជួយពង្រឹងប្រព័ន្ធភាពស៊ាំ។ ខ្ញី មានសារធាតុ Gingerol និង Shogaol ដែលអាចជួយកាត់បន្ថយការរលាក និងការឈឺចាប់សាច់ដុំ។​ ម្រះ​ សម្បូរទៅដោយសារធាតុប្រឆាំងអុកស៊ីតកម្ម ដែលជួយកាត់បន្ថយភាពតានតឹងក្នុងកោសិកា។​

ទោះជាយ៉ាងណា អ្នកជំនាញបញ្ជាក់ថា អាហារទាំងនេះគ្រាន់តែជួយគាំទ្រសុខភាព មិនអាចជំនួសថ្នាំព្យាបាលបានទេ។ ដើម្បីរក្សាប្រព័ន្ធភាពស៊ាំឱ្យរឹងមាំ គួររួមបញ្ចូលបន្លែ ផ្លែឈើ គ្រាប់ធញ្ញជាតិ អាហារធម្មជាតិ គេងឱ្យគ្រប់គ្រាន់ ហាត់ប្រាណជាប្រចាំ និងកាត់បន្ថយអាហារកែច្នៃ ស្ករច្រើន និងខ្លាញ់ឆ្អែត៕