យោងតាមការចុះផ្សាយពីប្រភពបរទេស កាហ្វេអាចជួយឱ្យភ្ញាក់ស្មារតី និងបង្កើនថាមពល ប៉ុន្តែទម្លាប់ផឹកមិនត្រឹមត្រូវអាចប៉ះពាល់ដល់សុខភាព។ អ្នកជំនាញបង្ហាញថា មានកំហុសមួយចំនួនដែលគួរប្រុងប្រយ័ត្ន។
ការដាក់ ក្រែមបន្ថែម ស្ករច្រើន ឬស៊ីរ៉ូផ្អែម អាចបង្កើនបរិមាណកាឡូរី និងស្ករដោយមិនចាំបាច់។ គួរជ្រើសរើសទឹកដោះគោគ្មានជាតិស្ករ ឬប្រើគ្រឿងទេសធម្មជាតិដូចជា ស៊ីណាម៉ុន ឬម្សៅកាកាវ ដើម្បីបន្ថែមរសជាតិ។
ការជ្រើសរើសគ្រាប់កាហ្វេគុណភាពទាប ឬផឹកកាហ្វេច្រើនពេក ក៏អាចបង្កហានិភ័យដល់សុខភាព។ ជាពិសេស ការផឹកកាហ្វេពេលរសៀល ឬមុនគេង អាចរំខានដល់ដំណេក ខណៈការផឹកពេលពោះទទេអាចបង្កអាស៊ីតក្រពះ និងមិនស្រួលក្នុងពោះ។
អ្នកជំនាញក៏ណែនាំឱ្យកុំប្រើកាហ្វេជំនួសទឹកស្អាត ព្រោះជាតិកាហ្វេអ៊ីនអាចជួយបង្កើនការបញ្ចេញទឹកនោម។ គួរជ្រើសរើសវិធីឆុងកាហ្វេដែលមានសុវត្ថិភាព ដូចជាឧបករណ៍ធ្វើពីកញ្ចក់ សេរ៉ាមិច ឬដែកអ៊ីណុក ជំនួសប្លាស្ទិកដែលអាចបញ្ចេញសារធាតុមិនល្អពេលប៉ះទឹកក្តៅ។
ការផឹកកាហ្វេដោយមានតុល្យភាព ជ្រើសរើសគ្រឿងផ្សំល្អ និងកាត់បន្ថយស្ករបន្ថែម អាចឱ្យអ្នកទទួលបានអត្ថប្រយោជន៍ពីកាហ្វេ ដោយមិនបង្កផលប៉ះពាល់ដល់សុខភាព៕