យោងតាមការចុះផ្សាយពីប្រភពបរទេស មនុស្សធ្វើការការិយាល័យជាច្រើនសង្កេតឃើញថា មុខមាត់ ស្បែក និងសក់មើលទៅស្រអាប់ ឬហត់នឿយក្រោយអង្គុយធ្វើការតែប៉ុន្មានម៉ោង។ អ្នកជំនាញថា មូលហេតុអាចមកពីបរិយាកាសក្នុងការិយាល័យ ជាពិសេស ខ្យល់ស្ងួត ប្រព័ន្ធម៉ាស៊ីនត្រជាក់ និងគុណភាពខ្យល់មិនល្អ។
ខ្យល់ដែលត្រូវបានបង្វិលប្រើឡើងវិញជាប្រចាំ អាចធ្វើឱ្យស្បែកបាត់បង់សំណើម បណ្តាលឱ្យស្បែកស្ងួត សក់សំពោង ភ្នែករលាក និងធ្វើឱ្យមើលទៅអស់កម្លាំងនៅចុងថ្ងៃ។ ក្រៅពីនេះ ពន្លឺភ្លើងហ្វ្លុយអូរ៉េសង់ក្នុងការិយាល័យ ក៏អាចមានឥទ្ធិពលលើស្បែកផងដែរ។
អ្នកជំនាញណែនាំឱ្យបុគ្គលិកការិយាល័យថែរក្សាស្បែកដោយផ្តល់សំណើមជាប្រចាំ ផឹកទឹកគ្រប់គ្រាន់ ប្រើម៉ាស៊ីនបន្ថែមសំណើមតូចៗលើតុ ឈប់សម្រាកដើម្បីទទួលខ្យល់អាកាសបរិសុទ្ធ និងជ្រើសរើសសម្លៀកបំពាក់ដែលអាចឱ្យស្បែកដកដង្ហើមបាន។
ការរក្សាបរិយាកាសការងារឱ្យស្អាត និងមានសំណើមសមរម្យ អាចជួយឱ្យមិនត្រឹមតែសុខភាពល្អប៉ុណ្ណោះទេ ប៉ុន្តែក៏ជួយរក្សារូបរាងស្រស់ស្រាយពេញមួយថ្ងៃផងដែរ៕