យោងតាមការចុះផ្សាយពីប្រភពបរទេស មនុស្សជាច្រើនគិតថា ការផឹកទឹកកកនៅរដូវក្តៅអាចប៉ះពាល់ដល់សុខភាព ប៉ុន្តែវេជ្ជបណ្ឌិតឯកទេសថ្លើមបញ្ជាក់ថា ទឹកកកមិនបង្កការខូចខាតដល់កោសិកាថ្លើមឡើយ ព្រោះរាងកាយអាចសម្របសីតុណ្ហភាពបាន។ អ្វីដែលគួរប្រុងប្រយ័ត្នជាងនេះ គឺទម្លាប់ញ៉ាំអាហារមិនត្រឹមត្រូវ។
អាហារ ៥ ប្រភេទដែលអាចបង្កគ្រោះថ្នាក់ដល់ថ្លើម ប្រសិនបើញ៉ាំញឹកញាប់ពេក រួមមានផ្សិតត្រាំទឹកយូរ ឬទុកមួយយប់,អាហារដែលមានផ្សិតដុះ ដូចជាគ្រាប់ធញ្ញជាតិ និងអាហារស្ងួតដែលអាចមានសារធាតុ Aflatoxin,ទឹកផ្លែឈើច្របាច់ទុកយូរ ឬផឹកច្រើនពេក,អាហារជ្រក់ឬត្រាំ និងអាហារកែច្នៃដែលមានសារធាតុរក្សាទុកច្រើន និងគ្រឿងស្រវឹង ជាពិសេសស្រាត្រាំឱសថដែលមិនច្បាស់ប្រភព។
អ្នកជំនាញណែនាំឱ្យជ្រើសរើសអាហារស្រស់ បរិភោគផ្លែឈើទាំងមូលជំនួសទឹកផ្លែឈើ បន្ថែមបន្លែបៃតង ខ្ទឹមស និងតែបៃតងក្នុងរបបអាហារ ជៀសវាងគ្រឿងស្រវឹង គេងឱ្យបានមុនម៉ោង ១១ យប់ និងពិនិត្យសុខភាពថ្លើមជាប្រចាំ ដើម្បីការពារជំងឺថ្លើម និងកាត់បន្ថយហានិភ័យមហារីក៕