យោងតាមការចុះផ្សាយពីប្រភពបរទេស វេជ្ជបណ្ឌិតព្រមានថា មហារីកបំពង់ច្រមុះ-បំពង់កកំពុងមានអត្រាកើនឡើងនៅតំបន់អាស៊ីអាគ្នេយ៍ ហើយរោគសញ្ញាដំណាក់កាលដំបូងងាយច្រឡំជាជំងឺត្រចៀក ច្រមុះ និងបំពង់កធម្មតា។ សញ្ញាសំខាន់ៗដែលគួរប្រុងប្រយ័ត្នមាន ហូរឈាមច្រមុះ ឬសំបោរលាយឈាម, តឹងច្រមុះតែម្ខាងលើសពី ២ សប្តាហ៍, ឮសូរក្នុងត្រចៀក ឬស្តាប់ឮថយចុះ និង មានដុំកូនកណ្តុររឹងនៅក ដែលមិនឈឺ និងរីកធំឡើងជាបន្តបន្ទាប់។
អ្នកជំនាញណែនាំថា ប្រសិនបើរោគសញ្ញាទាំងនេះបន្តលើសពី ២ សប្តាហ៍ ឬកាន់តែធ្ងន់ធ្ងរ គួរទៅពិនិត្យជាមួយវេជ្ជបណ្ឌិតឯកទេសភ្លាមៗ។ ការរកឃើញជំងឺនៅដំណាក់កាលដំបូង អាចបង្កើនប្រសិទ្ធភាពនៃការព្យាបាល និងឱកាសជាសះស្បើយបានយ៉ាងច្រើន៕