យោងតាមការចុះផ្សាយពីប្រភពបរទេស ការកោរពុកមាត់ជាប្រចាំអាចក្លាយជាបញ្ហាសម្រាប់បុរសដែលមានស្បែកងាយប្រតិកម្ម ដោយអាចបង្កឱ្យមានអាការៈក្រហម រមាស់ ឈឺចាប់ ឬរោមដុះចូលស្បែក។ ប៉ុន្តែការកែប្រែវិធីកោរបន្តិចបន្តួច អាចជួយឱ្យស្បែកមុខរលោង និងកាត់បន្ថយការរលាកបាន។
ជំហានដំបូង គឺគួររៀបចំស្បែកដោយប្រើទឹកក្តៅ ឬកន្សែងក្តៅស្អំលើតំបន់ត្រូវកោររយៈពេល ២ ទៅ ៣ នាទី ដើម្បីធ្វើឱ្យរោមទន់ និងកាត់បន្ថយការកកិតរវាងឡាមនិងស្បែក។
បុរសដែលមានស្បែកងាយប្រតិកម្មគួរជ្រើសរើសជែល ឬហ្វូមកោរពុកមាត់ដែលមានរូបមន្តទន់ភ្លន់ និងជៀសវាងផលិតផលដែលមានអាល់កុល ឬក្លិនក្រអូបខ្លាំង ព្រោះអាចធ្វើឱ្យស្បែកស្ងួត និងរលាក។
ការប្រើឡាមដែលស្អាត និងមុតក៏ជារឿងសំខាន់។ ឡាមទ្រុឌទ្រោមអាចធ្វើឱ្យត្រូវកោរច្រើនដងនៅកន្លែងដដែល បង្កើនហានិភ័យរបួសតូចៗ និងរោមដុះចូលស្បែក។
អ្នកជំនាញណែនាំឱ្យកោរតាមទិសដៅដែលរោមដុះ មិនគួរកោរបញ្ច្រាសទិស ព្រោះអាចធ្វើឱ្យរោមត្រូវទាញចូលក្រោមស្បែក និងបង្កការរលាក។ ក៏គួរជៀសវាងការចុចឡាមខ្លាំងពេក ព្រោះអាចធ្វើឱ្យស្រទាប់ស្បែកខូច។
បន្ទាប់ពីកោររួច គួរលាងមុខដោយទឹកត្រជាក់ ដើម្បីជួយបន្ថយការរលាក និងធ្វើឱ្យស្បែកស្រស់ស្រាយ។ បន្ទាប់មកអាចប្រើក្រែមថែស្បែកក្រោយកោរ ដែលគ្មានអាល់កុល ដើម្បីបន្ថែមសំណើម និងជួយស្តារស្បែកឡើងវិញ។
ការថែរក្សាស្បែកមុខឱ្យរលោងមិនមែនជារឿងពិបាកទេ ប្រសិនបើជ្រើសរើសវិធីកោរដែលសមស្រប។ ការអនុវត្តវិធីទាំងនេះអាចជួយឱ្យបុរសមានមុខមាត់ស្អាតស្អំ កាត់បន្ថយការឈឺចាប់ និងរក្សាស្បែកឱ្យមានសុខភាពល្អបានយូរ៕