យោងតាមការចុះផ្សាយពីប្រភពបរទេស អ្នកជំនាញបេះដូងអាម៉េរិកណែនាំថា ការដើរលឿនប្រហែល ២០-៣០នាទីក្នុងមួយថ្ងៃ អាចជាវិធីសាមញ្ញមួយជួយការពារសរសៃឈាម និងបេះដូង ជាពិសេសសម្រាប់មនុស្សអាយុលើស ៥០ឆ្នាំ ដែលមានហានិភ័យសរសៃឈាមរឹង រួមតូច និងកកកុញកំណកខ្លាញ់កាន់តែច្រើន។
ការដើរលឿនជាប្រចាំអាចជួយបន្ថយសម្ពាធឈាម ធ្វើឱ្យសរសៃឈាមមានភាពបត់បែនល្អ បង្កើនកូឡេស្តេរ៉ុលល្អនិងជួយគ្រប់គ្រងការរលាកក្នុងរាងកាយ។ អ្នកជំនាញណែនាំថា ល្បឿនដើរដែលល្អគឺអាចនិយាយបាន ប៉ុន្តែមិនអាចច្រៀងបាន ដែលបង្ហាញថាបេះដូងកំពុងធ្វើការក្នុងកម្រិតសមស្រប។
សម្រាប់អ្នកមិនធ្លាប់ហាត់ប្រាណ អាចចាប់ផ្តើមពី ១០នាទីក្នុងមួយថ្ងៃ ហើយបង្កើនបន្តិចម្តងៗ។ ក្រៅពីការដើរ គួររួមបញ្ចូលការញ៉ាំអាហារមានសុខភាពល្អ គ្រប់គ្រងភាពតានតឹង និងហាត់ប្រាណពង្រឹងសាច់ដុំ ដើម្បីរក្សាសុខភាពបេះដូងបានយូរអង្វែង៕