ដៃ មិនត្រឹមតែជាផ្នែកមួយនៃរាងកាយដែលលេចចេញនូវសញ្ញានៃភាពចាស់តាមវ័យឡើយ ប៉ុន្តែក៏អាចចង្អុលបង្ហាញអោយដឹងពីបញ្ហាសុខភាពមួយចំនួនផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) វេជ្ជបណ្ឌិតជាច្រើននិយាយថា ស្ថានភាព ឬភាពប្រែប្រួលណាមួយដែលកើតមានចំពោះដៃដៃអាចជាលទ្ធផលនៃភាពមិនប្រក្រតីក្នុងរាងកាយ។ ហើយអ្នកមិនគួរធ្វេសប្រហែសមើលរំលងឡើយ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរោគសញ្ញាចំនួន ៦ ដែលអ្នកគួរយកចិត្តទុកដាក់ដើម្បីរក្សាបាននូវសុខភាពល្អប្រសើរ ដោះស្រាយបញ្ហាបានទាន់ពេល ៖

១. បាតដៃឡើងក្រហម

វេជ្ជបណ្ឌិតជាច្រើនពន្យល់ថា បាតដៃឡើងក្រហម អាចជារោគសញ្ញាមួយនៃបញ្ហាថ្លើម ជាពិសេសប្រសិនបើអ្នកមានអាយុលើសពី ៥០ ឆ្នាំ។ ជាធម្មតា ការឡើងក្រហម គឺមានទីតាំងនៅគែមខាងក្រៅនៃបាតដៃ។ មូលហេតុដែលអាចទៅរួចសម្រាប់បញ្ហាបាតដៃឡើងក្រហម គឺការផ្លាស់ប្ដូរ ឬភាពប្រែប្រួលមួយនៅក្នុងតុល្យភាពអ័រម៉ូនដែលបណ្ដាលឱ្យសសៃឈាមរីក។ ជំងឺរលាកសន្លាក់រ៉ាំរ៉ៃក៏អាចជាមូលហេតុមួយនៃការឡើងក្រហមលើបាតដៃផងដែរ។ ដើម្បីជាការប្រសើរ ប្រសិនបើអ្នកសម្គាល់ឃើញមានឡើងក្រហមត្រង់ផ្នែកណាមួយលើបាតដៃ អ្នកគួរប្រញាប់ទៅជួបពិគ្រោះជាមួយគ្រូពេទ្យ។ ហើយក៏កុំភ្លេចកាត់បន្ថយការទទួលទានគ្រឿងស្រវឹង និងព្យាយាមផ្លាស់ប្ដូរទៅជារបបអាហារសុខភាពល្អ។

២. បែកញើសបាតដៃ

ការបែកញើសបាតដៃអាចបណ្ដាលមកពីមូលហេតុមួយចំនួនដូចជា ជំងឺ hyperhidrosis (ការបែកញើសហួសប្រមាណ), ភាពតានតឹងក្នុងអារម្មណ៍ និងភាពសកម្មហួសនៃក្រពេញទីរ៉ូអ៊ីត ឬជំងឺក្រពេញទីរ៉ូអ៊ីត។ ក្នុងករណីជំងឺ hyperhidrosis ដែលបណ្ដាលអោយបែកញើសច្រើនហួស អ្នកអាចប្រើប្រាស់ផលិតផលទប់ស្កាត់ការបែកញើសខ្លាំង ឬទទួលយកការព្យាបាលតាមបែបវេជ្ជសាស្ត្រ។ ព្យាយាមកម្រិតការទទួលទានគ្រឿងស្រវឹង និងរៀនគ្រប់គ្រងកម្រិតនៃភាពតានតឹងក្នុងរបស់អ្នក (ដកដង្ហើមចេញចូលវែងៗមួយៗ)។ ប្រសិនបើហាក់ដូចជាគ្មានវិធីណាមួយដោះស្រាយបញ្ហានេះបាន អ្នកគួរជួបពិនិត្យផ្ទាល់ជាមួយគ្រូពេទ្យ។

៣. ស្ពឹកដៃ និងឈឺឆៀបៗ

ជួនកាលយើងក្រោកឡើងជាមួយនឹងអារម្មណ៍ថា ស្ពឹក​​​ត្រង់ផ្នែកណាមួយនៃរាងកាយ ហើយបន្តិចក្រោយមកក៏ចាប់ផ្ដើមឈឺឆៀបៗ។ ជាធម្មតា បញ្ហានេះកើតឡើងដោយសារយើងសង្កត់លើសសៃប្រសាទយូរ។ ការឈឺឆៀបៗ គឺជាពេលដែលសសៃប្រសាទត្រឡប់ទៅរកសភាពធម្មតាវិញ។ ក្នុងករណីខ្លះអាការៈបែបនេះអាចជារោគសញ្ញាមួយនៃបញ្ហាសុខភាពធ្ងន់ធ្ងរដូចជា ជំងឺ cervical osteochondrosis, កៀបសសៃកដៃ, កកឈាមក្នុងសសៃឈាមខ្មៅនៃអវយវៈ, របួសសសៃប្រសាទ, ជំងឺខ្វះគ្រាប់ឈាមក្រហម និងជំងឺទឹកនោមផ្អែម។ ប្រសិនបើអ្នកឧស្សាហ៍ជួបប្រទះអាការៈស្ពឹកស្រពន់ និងឈឺឆៀបៗក្នុងដៃដោយគ្មានមូលហេតុណាមួយច្បាស់លាស់ ចូរប្រញាប់ទៅជួបពិនិត្យពិគ្រោះជាមួយគ្រូពេទ្យ។

៤. ស្ងួតប្រអប់ដៃ

មូលហេតុទូទៅបំផុតនៃបញ្ហាដៃស្ងួត គឺការខ្សោះជាតិទឹកក្នុងរាងកាយ និងកង្វះអ័រម៉ូនអេស្ត្រូជែន (estrogen) ដែលជាញឹកញយផ្សារភ្ជាប់ជាមួយការអស់រដូវរបស់ស្ត្រី។ ដើម្បីជៀសផុតពីបញ្ហាខ្សោះជាតិទឹកក្នុងរាងកាយដែលបង្កអាការៈស្ងួតដៃ ចូរទទួលទានទឹកអោយច្រើនគ្រប់គ្រាន់ និងកុំភ្លេចប្រើប្រាស់ក្រែម ឬឡេផ្ដល់សំណើម។ រួមបញ្ចូលត្រីសម្បូរខ្លាញ់, គ្រាប់ពូជ និងគ្រាប់ធញ្ញជាតិក្នុងរបបអាហារប្រចាំថ្ងៃ។ ដោះស្រាយបញ្ហាកង្វះអ័រម៉ូនអេស្ត្រូជែនតាមរយៈការជួបពិនិត្យជាមួយគ្រូពេទ្យ។

៥. ការញ័រដៃ

អាការៈញ័រដៃអាចជារោគសញ្ញាមួយនៃបញ្ហាសុខភាពធ្ងន់ធ្ងរដូចជា ជំងឺ Parkinson’s Disease។ ប្រសិនបើមានការព្រួយបារម្ភខ្លាំង ចូរណាត់ជួបពិគ្រោះជាមួយគ្រូពេទ្យ។ ហើយដើម្បីជាការប្រសើរ កុំភ្លេចកាត់បន្ថយការទទួលទានកាហ្វេ និងគ្រឿងស្រវឹង ដោយភេសជ្ជៈប្រភេទនេះក៏អាចបង្កអាការៈញ័រដៃផងដែរ។ កត្តាផ្សេងទៀតនៃអាការៈញ័រដៃ គឺជំងឺថប់បារម្ភ និងស្ត្រេស។

៦. ក្រចកផុយឆាប់បាក់ 

ក្រចកផុយឆាប់បាក់ អាចជារោគសញ្ញាមួយនៃកង្វះជាតិស័ង្កសី។ ជាតិស័ង្កសី គឺសំខាន់ណាស់សម្រាប់សុខភាពរាងកាយ វាជួយពន្លឿនការជាសះស្បើយ, ជួយបែងចែកកោសិកា និងពង្រឹងប្រព័ន្ធភាពស៊ាំនៃរាងកាយ។ ចូរបន្ថែមអាហារមានផ្ទុកសម្បូរទៅដោយជាតិស័ង្កសី រួមទាំង ស៊ុត គ្រាប់ធញ្ញជាតិ និងសាច់ ជាដើម ក្នុងរបបអាហារប្រចាំថ្ងៃ។ វេជ្ជបណ្ឌិតភាគច្រើនណែនាំអោយទទួលទានថ្នាំគ្រាប់ជាតិស័ង្កសី ប្រសិនបើរាងកាយមានផ្ទុកវាទាបពេក៕