មនុស្សភាគច្រើនតែងតែមានទម្លាប់រកកន្លែងគេង ឬអង្គុយលេងទូរស័ព្ទភ្លាមៗបន្ទាប់ពីញ៉ាំអាហារពេលថ្ងៃត្រង់ ឬពេលល្ងាចរួច។ ប៉ុន្តែនៅក្នុងសង្គមរស់នៅបច្ចុប្បន្ន យើងតែងតែឮការណែនាំតៗគ្នាថា «គួរដើរតិចតួចក្រោយញ៉ាំបាយឆ្អែត ដើម្បីកុំឱ្យកកកុញខ្លាញ់ និងជួយរំលាយអាហារ»។
តើការណែនាំនេះពិតជាមានប្រសិទ្ធភាពតាមបែបវិទ្យាសាស្ត្រ ឬគ្រាន់តែជាជំនឿ? មកស្វែងយល់ពីការពិត និងអត្ថប្រយោជន៍ដ៏អស្ចារ្យនៃការដើរក្រោយអាហារទាំងអស់គ្នា៖
សម្រួលដល់ការរំលាយអាហារ៖ ពិតប្រាកដមែន!
នៅពេលយើងដើរតិចតួចក្រោយញ៉ាំអាហារ វាទៅជម្រុញដល់ការកន្ត្រាក់នៃសាច់ដុំក្រពះ និងពោះវៀន ដែលធ្វើឱ្យអាហារធ្វើចលនាឆ្លងកាត់ប្រព័ន្ធរំលាយអាហារបានលឿនជាងមុន។
-កាត់បន្ថយការណែនពោះ៖ ការដើរជួយកាត់បន្ថយអាការហើមពោះ ភើ និងទល់លាមក។
-ទប់ស្កាត់អាស៊ីតច្រាល៖ ការរក្សាជំហររាងកាយឱ្យត្រង់ (តាមរយៈការដើរ) ជួយទប់ស្កាត់មិនឱ្យទឹកអាស៊ីតក្រពះច្រាលឡើងមកលើបំពង់អាហារ ដែលបង្កជាការក្រហាយទ្រូង ផ្ទុយពីការដេកភ្លាមៗបន្ទាប់ពីញ៉ាំឆ្អែត។
ជួយសម្រកទម្ងន់ និងគ្រប់គ្រងគីឡូ ៖ ពិតប្រាកដមែន!
ការដើរក្រោយញ៉ាំបាយ មិនមែនជាការហាត់ប្រាណយកស្លាប់រស់នោះទេ ប៉ុន្តែវាគឺជាយុទ្ធសាស្ត្រដ៏វៃឆ្លាតក្នុងការគ្រប់គ្រងថាមពល ៖
-ដុតបំផ្លាញកាឡូរីទាន់ពេល៖ រាល់ជំហានដែលអ្នកដើរ គឺជារលកនៃការដុតបំផ្លាញថាមពលដែលទើបតែទទួលបានពីអាហារ ធ្វើឱ្យរាងកាយមិនសល់ថាមពលលើសទៅបង្កើតជាខ្លាញ់កកកុញ។
-គ្រប់គ្រងកម្រិតជាតិស្ករក្នុងឈាម៖ នេះជាចំណុចសំខាន់បំផុត! បន្ទាប់ពីញ៉ាំអាហារ ជាតិស្ករក្នុឈាមនឹងហក់ឡើងខ្ពស់។ ការដើរត្រឹមតែ ១០ ទៅ ១៥ នាទី នឹងបង្ខំឱ្យសាច់ដុំដកយកជាតិស្ករទាំងនោះទៅប្រើប្រាស់ជាថាមពលភ្លាមៗ។ កាលណាជាតិស្ករក្នុងឈាមមានលំនឹង វានឹងជួយកាត់បន្ថយការអត់ឃ្លានកំប៉ិកកំប៉ុក និងទប់ស្កាត់ការឡើងគីឡូបានយ៉ាងស័ក្តិសិទ្ធិ។
តិចនិក «ដើរឱ្យត្រូវវិធី» ក្រោយញ៉ាំអាហារ
ដើម្បីទទួលបានផលប្រយោជន៍ខ្ពស់ និងមិនប៉ះពាល់ដល់សុខភាពក្រពះ អ្នកគួរអនុវត្តតាមគោលការណ៍សាមញ្ញទាំងនេះ៖
-ដើរបែបកម្សាន្ត (Stroll, Don’t Run)៖ ត្រូវដើរយឺតៗតាមសម្រួល មិនមែនដើរលឿនៗ ឬរត់នោះទេ។ ការហាត់ប្រាណខ្លាំងៗភ្លាមៗក្រោយញ៉ាំបាយ នឹងធ្វើឱ្យឈាមរត់ទៅកាន់សាច់ដុំដៃជើងខ្លាំងជាងទៅកាន់ក្រពះ ដែលអាចបណ្តាលឱ្យចុកពោះ ឬចង្រ្កង់ឡើយ។
-រយៈពេលសមស្រប៖ គួរដើរចន្លោះពី ១០ ទៅ ២០ នាទី គឺគ្រប់គ្រាន់បំផុតហើយ។
-ពេលវេលាល្អ៖ ចាប់ផ្តើមដើរក្នុងចន្លោះពេល ៥ ទៅ ១០ នាទី បន្ទាប់ពីញ៉ាំអាហាររួច។
ការដើរបន្ទាប់ពីញ៉ាំបាយឆ្អែត មិនមែនជាជំនឿតៗគ្នានោះទេ ប៉ុន្តែវាជា «ឱសថធម្មជាតិ» ដ៏សាមញ្ញ និងឥតគិតថ្លៃ ដែលជួយទាំងប្រព័ន្ធរំលាយអាហារ ជួយទាំងការគ្រប់គ្រងជាតិស្ករ និងរាងកាយ។