នាពេលបច្ចុប្បន្ន ទូរស័ព្ទដៃបានក្លាយជាវត្ថុមិនអាចខ្វះបាននៅក្នុងជីវិតប្រចាំថ្ងៃ រហូតដល់មនុស្សជាច្រើនមានទម្លាប់ «កាន់ទូរស័ព្ទចូលបន្ទប់ទឹក» ជានិច្ច។ ទោះបីជាការអង្គុយចុចទូរស័ព្ទ មើលវីដេអូ ឬអូសកម្សាន្តនៅលើបណ្តាញសង្គមក្នុងអំឡុងពេលបត់ជើងធំ មើលទៅជាការសម្លាប់ពេល និងជារឿងធម្មតាក៏ដោយ ប៉ុន្តែនៅក្នុងផ្នែកវេជ្ជសាស្ត្រ ទម្លាប់មួយនេះកំពុងតែបំផ្លាញសុខភាពរាងកាយរបស់អ្នកយ៉ាងស្ងៀមស្ងាត់ និងបង្កគ្រោះថ្នាក់ខ្លាំងលើសពីអ្វីដែលអ្នកធ្លាប់គិតទៅទៀត។
ខាងក្រោមនេះជាផលប៉ះពាល់ និងគ្រោះថ្នាក់ធំៗដែលកើតចេញពីទម្លាប់ចុចទូរស័ព្ទក្នុងបន្ទប់ទឹក៖
១. ឃាតករបង្ក «ជំងឺឫសដូងបាត»
នៅពេលដែលអ្នកកាន់ទូរស័ព្ទចូលបន្ទប់ទឹក ចិត្តរបស់អ្នកនឹងជក់ទៅលើផ្ទៃអេក្រង់ ដែលធ្វើឱ្យអ្នក «អង្គុយលើបង្គន់យូរហួសពេល» ដោយមិនដឹងខ្លួន (ជួនកាលរហូតដល់ទៅ ២០ ទៅ ៣០ នាទី)។
-យន្តការគ្រោះថ្នាក់៖ ការអង្គុយនៅលើចានបង្គន់ដែលមានចន្លោះប្រហោងកណ្តាលក្នុងរយៈពេលយូរ នឹងបង្កើតសម្ពាធយ៉ាងខ្លាំងទៅលើសរសៃឈាមនៅត្រង់តំបន់រន្ធគូទ។ សម្ពាធនេះធ្វើឱ្យសរសៃឈាមហើម រលាក និងរីកប៉ោង ដែលជាដើមហេតុចម្បងបង្កជា «ជំងឺឫសដូងបាត» ធ្វើឱ្យមានការឈឺចាប់ និងបត់ជើងធំមកមានឈាម។
២. ទូរស័ព្ទក្លាយជា «ប្រភពផ្ទុកមេរោគសាហាវ»
បន្ទប់ទឹកគឺជាកន្លែងដែលពោរពេញទៅដោយបាក់តេរី និងមេរោគជាច្រើនប្រភេទ។ នៅពេលដែលអ្នកចុចទូរស័ព្ទក្នុងបន្ទប់ទឹក មេរោគទាំងនោះនឹងទំជាប់នៅលើដៃ និងផ្ទៃអេក្រង់ទូរស័ព្ទរបស់អ្នកភ្លាមៗ។
-មេរោគលាក់មុខ៖ តាមការស្រាវជ្រាវ គេបានរកឃើញមេរោគសាហាវៗដូចជា E. coli (បង្កការរាករូស និងឆ្លងរោគក្នុងផ្លូវរំលាយអាហារ) និង Salmonella នៅលើអេក្រង់ទូរស័ព្ទរបស់អ្នកដែលចូលចិត្តចូលបន្ទប់ទឹក។ អ្វីដែលគួរឱ្យខ្លាចគឺ បន្ទាប់ពីចេញពីបន្ទប់ទឹក ទោះបីជាអ្នកបានលាងដៃនឹងសាប៊ូស្អាតក៏ដោយ ប៉ុន្តែនៅពេលអ្នកមកកាន់ទូរស័ព្ទដដែលនោះ មេរោគនឹងឆ្លងមកដៃអ្នកវិញ ហើយវាអាចចូលទៅក្នុងរាងកាយនៅពេលអ្នកយកដៃទៅចាប់កាន់ចំណីអាហារ ឬប៉ះពាល់ផ្ទៃមុខ។
៣. បង្ក «រោគសញ្ញាការិយាល័យ» (Office Syndrome) និងឈឺសន្លាក់
ការអង្គុយឱនក្បាលចុចទូរស័ព្ទនៅលើបង្គន់ ធ្វើឱ្យឆ្អឹងកងក ចង្កេះ និងស្មា ត្រូវទ្រង់ទម្ងន់ខុសទម្រង់ធម្មជាតិ។ ការធ្វើបែបនេះយូរៗទៅ នឹងបង្កឱ្យមានការឈឺចង្កេះ ឈឺក ស្ពឹកស្រពន់ដៃជើង និងអាចវិវត្តទៅជាជំងឺស្រុតឆ្អឹងកង ឬជំងឺប្រព័ន្ធសរសៃប្រសាទ ដែលស្រដៀងទៅនឹងអាការៈ Office Syndrome ដែរ។
៤. គ្រោះថ្នាក់ស្រុត ឬធ្លាក់ពោះវៀន
ចំពោះបុគ្គលមួយចំនួនដែលមានសុខភាពសាច់ដុំអាងត្រគាកខ្សោយ ការអង្គុយប្រឹង និងបង្អង់នៅលើបង្គន់យូរពេកដើម្បីចុចទូរស័ព្ទ អាចបណ្តាលឱ្យមានសម្ពាធរុញច្រានធ្វើឱ្យភ្នាសពោះវៀនធំផ្នែកខាងចុង ស្រុត ឬលៀនធ្លាក់មកក្រៅរន្ធគូទ ដែលទាមទារការវះកាត់ព្យាបាលយ៉ាងទាន់ហន់។
ចូរកុំបណ្តោយឱ្យភាពជក់ចិត្តមួយភាំង បង្កើតជាទុក្ខទោស និងវិបត្តិសុខភាពរ៉ាំរ៉ៃដល់ខ្លួនឯងអី ៕