យោងតាមការចុះផ្សាយពីប្រភពបរទេស ជំងឺមហារីកក្រពះច្រើនតែវិវត្តខ្លួនយ៉ាងស្ងៀមស្ងាត់ដោយសារទម្លាប់រស់នៅប្រចាំថ្ងៃ។ គ្រូពេទ្យជំនាញបានព្រមានឱ្យកម្ចាត់ចោលជាបន្ទាន់នូវទម្លាប់ទាំង ៥ ខាងក្រោមនេះ៖
ទម្លាប់ទីមួយគឺការបរិភោគប្រៃពេក។ អាហារផ្អាប់ គ្រឿងកំប៉ុង និងអាហារប្រៃ បំផ្លាញស្រទាប់ការពារក្រពះ និងបង្កើនហានិភ័យមហារីកដល់ទៅ ៤១ភាគរយ។
ទម្លាប់ទីពីរគឺការជក់បារី។ ជាតិពុលក្នុងបារីមិនត្រឹមតែបំផ្លាញសួតទេ ថែមទាំងកាត់បន្ថយភាពស៊ាំ និងបង្កើនហានិភ័យមហារីកក្រពះទ្វេដង។
ទម្លាប់ទីបីគឺការញ៉ាំស្ករនិងភេសជ្ជៈផ្អែមច្រើន ដែលបង្កជាជំងឺធាត់និងជំរុញការវិវត្តនៃកោសិកាមហារីកក្នុងប្រព័ន្ធរំលាយអាហារ។
ទម្លាប់ទីបួនគឺការបរិភោគបន្លែនិងផ្លែឈើតិចតួច។ កង្វះវីតាមីននិងជាតិសរសៃធ្វើឱ្យបាត់បង់កម្លាំងការពារ និងប្រឆាំងការបំផ្លាញកោសិកាក្នុងក្រពះ។
ទម្លាប់ទីប្រាំគឺភាពតានតឹងផ្លូវចិត្តរ៉ាំរ៉ៃ។ សម្ពាធធ្វើឱ្យប្រព័ន្ធភាពស៊ាំចុះខ្សោយ និងប៉ះពាល់ផ្ទាល់ដល់មុខងារក្រពះ។
រោគសញ្ញាដំបូងនៃជំងឺមហារីកក្រពះរួមមានការក្រហាយទ្រូង រំលាយអាហារមិនល្អ ឈឺចុកចាប់ក្នុងពោះ បាត់បង់ចំណង់អាហារ និងស្រកទម្ងន់ខុសប្រក្រតី។ ប្រសិនបើមានអាការទាំងនេះ ត្រូវប្រញាប់ទៅជួបគ្រូពេទ្យដើម្បីពិនិត្យនិងព្យាបាលទាន់ពេលវេលា៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕