ជាធម្មតា អាការៈទល់លាមក គឺកើតមានឡើងនៅពេលចលនាពោះវៀនជួបការពិបាក ហើយស្ដុកកាកសំណល់មិនបញ្ចេញមកក្រៅរហូតដល់ទៅច្រើនជាង ៣ ថ្ងៃ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) បញ្ហាទល់លាមក គឺមិនមែនជារឿងលេងសើចនោះទេ ខណៈដែលរាងកាយត្រូវការបញ្ចេញកាកសំណល់ ដើម្បីជៀសវាងការបង្កទៅជាជាតិពុលផ្ដល់ផលប៉ះពាល់គួរឲ្យព្រួយបារម្ភក្នុងរាងកាយ។ ប្រសិនបើអ្នកកំពុងជួបប្រទះបញ្ហាទល់លាមក ឬចង់បង្ការបញ្ហានេះកុំឲ្យកើតឡើង ចូរបន្តអានដោយយកចិត្តទុកដាក់។ ថ្ងៃនេះវេបសាយសុខភាព Health.com.kh នឹងបង្ហាញឲ្យដឹងពីគន្លឹះបែបធម្មជាតិដែលជួយទប់ទល់ ក៏ដូចជាព្យាបាលបញ្ហាទល់លាមក តាមរយៈការទទួលទាន និងទម្លាប់ប្រចាំថ្ងៃ ៖
១. ទទួលទានអាហារសម្បូរទៅដោយជាតិសសៃ
បង្កើនការទទួលទានអាហារសម្បូរទៅដោយជាតិសសៃ ក៏ព្រោះជាតិសសៃ គឺចាំបាច់ណាស់ក្នុងការសម្រួលចលនាពោះវៀន។ បន្លែផ្លែឈើភាគច្រើន រួមបញ្ចូលទាំង ការ៉ុត, ទំពាំងបារាំង, ពន្លកស្ពៃ, ផ្លែព្រូន, ផ្លែចេក, ក្រូចឆ្មារ គឺជាប្រភពដ៏ប្រសើរនៃជាតិសសៃ។ ទោះជាយ៉ាងណា ប្រសិនបើអ្នកមិនធ្លាប់ទទួលទានជាតិសសៃពីមុនមកសោះ ក៏កុំទទួលទានច្រើនពេក ចាប់ផ្ដើមត្រឹមចំនួនសមល្មមបានហើយ ដើម្បីជៀសផុតពីបញ្ហាហើមរមួលពោះ។
២. ទទួលទានទឹកឱ្យបានច្រើន
ក៏ដូចទៅនឹងពេលដែលអ្នករាគដែរ ទឹក គឺចាំបាច់ណាស់នៅពេលអ្នកទល់លាមក។ អ្នកគួរបង្កើនការទទួលទានទឹក ដើម្បីទប់ស្កាត់បញ្ហាលាមកឡើងរឹងស្ងួតពិបាកនឹងបញ្ចេញ។ ការទទួលទានទឹកច្រើនគ្រប់គ្រាន់ធ្វើឱ្យលាមកទន់ងាយនឹងបញ្ចេញមកក្រៅ។ អ្នកក៏អាចទទួលទានទឹកក្រូចឆ្មារផងដែរ ដោយគ្រាន់តែច្របាច់ក្រូចឆ្មារមួយចូលក្នុងទឹកក្ដៅឧណ្ហៗ ១ពែង។ទឹកក្រូចឆ្មារក្ដៅឧណ្ហៗជួយសម្រួលដល់ការរំលាយអាហារឱ្យកាន់តែប្រសើរ និងសកម្ម។
៣. ដឹងពីអ្វីដែលគួរជៀសវាង
ប្រសិនបើអ្នកកំពុងជួបប្រទះអាការៈទល់លាមក អ្នកគួរជៀសឱ្យផុតពីការទទួលទានឈីស និងផលិតផលអាហារផ្សំឡើងពីទឹកដោះគោ។ ក៏ព្រោះនៅពេលអ្នកចាញ់ឡាក់តូស ការទទួលទានអាហារផ្សំឡើងពីទឹកដោះគោអាចបង្កអាការៈហើមពោះ, ឡើងហ្គាសក្នុងពោះ និងទល់លាមក។ កាត់បន្ថយ ឬបញ្ឈប់ការទទួលទានអាហារទាំងនេះ រហូតដល់អាការៈធូរស្បើយ។ ទោះបីជា យ៉ាអួរ ផ្សំឡើងពីទឹកដោះគោ ប៉ុន្តែអ្នកមិនគួរជៀសវាងមិនទទួលទានឡើយ ក៏ព្រោះវាមានផ្ទុកប្រូបាយអូទិក ឬបាក់តេរីល្អៗដែលជួយទប់ស្កាត់ព្យាបាលអាការៈទល់លាមកបានយ៉ាងប្រសើរ។
៤. ធ្វើលំហាត់ប្រាណ
សកម្មភាពរាងកាយមួយចំនួនក៏អាចជួយទប់ស្កាត់ព្យាបាលអាការៈទល់លាមកបានយ៉ាងប្រសើរផងដែរ។ អ្នកអាចចាប់ផ្ដើមជាមួយលំហាតប្រាណងាយៗ ដូចជា ដើរយឺតៗសម្រាប់រយៈ ៣០ វិនាទី រហូតដល់មានអារម្មណ៍ធូរស្រាលជាងមុន។ ការធ្វើលំហាត់ប្រាណមួយចំនួនអាចជួយម៉ាស្សាពោះវៀន ដូច្នេះអ្នកនឹងមិនជួបប្រទះបញ្ហាទាក់ទងជាមួយលាមកទៀតឡើយ៕