យោងតាមការចុះផ្សាយពីប្រភពបរទេស សុខភាពបេះដូងដើរតួនាទីយ៉ាងសំខាន់ក្នុងជីវិត។ ក្រៅពីការពិនិត្យតាមបែបវេជ្ជសាស្ត្រ យើងអាចសង្កេតមើលភាពប្រក្រតីនៃបេះដូងតាមរយៈចំណុចនៅលើផ្ទៃមុខនិងត្រចៀក។
ស្បែកមុខរបស់អ្នកដែលមានបញ្ហាបេះដូងខ្សោយច្រើនតែស្លេកស្លាំង ស្រអាប់ ឬប្រែពណ៌ទៅជាស្វាយនិងត្នោតចាស់ ដោយសារការបញ្ជូនឈាមនិងអុកស៊ីហ្សែនមិនគ្រប់គ្រាន់។ នៅត្រង់គល់ច្រមុះអាចមានស្នាមផត សរសៃឈាមវ៉ែនឡើងប៉ោងច្បាស់ ឬស្លាបច្រមុះរីកធំនិងហើមប៉ោង ដែលជាសញ្ញាបង្ហាញពីចរន្តឈាមរត់មិនស្រួលនិងជាសញ្ញាជំងឺសរសៃឈាមបេះដូង។
ទន្ទឹមនឹងនេះ ភាពមិនប្រក្រតីក៏ត្រូវបានបង្ហាញនៅជុំវិញកែវភ្នែកដែលមានរង្វង់ពណ៌ប្រផេះឬដុំពកពណ៌លឿងជុំវិញត្របកភ្នែក បង្ហាញពីកម្រិតជាតិខ្លាញ់ក្នុងឈាមខ្ពស់ដែលជាហានិភ័យនៃជំងឺបេះដូង។ បបូរមាត់ឡើងពណ៌ស្វាយឬខៀវស្រងាត់ក៏ជាសញ្ញាបញ្ជាក់ថាបេះដូងកំពុងប្រឹងប្រែងបូមឈាមទៅចិញ្ចឹមរាងកាយ។
ចំណុចចុងក្រោយគឺការមានស្នាមជ្រួញឬផតជាបន្ទាត់ទ្រេត ៤៥ដឺក្រេនៅលើទងត្រចៀក ដែលជាសញ្ញាបញ្ជាក់ពីជំងឺសរសៃឈាមបេះដូងឬការកកស្ទះសរសៃឈាម។
ការសង្កេតខាងលើគ្រាន់តែជាការប្រុងប្រយ័ត្នជាមុនប៉ុណ្ណោះ។ ប្រសិនបើអ្នកមានរោគសញ្ញាទាំងនេះរួមជាមួយការចុកទ្រូង ហត់ ឬវិលមុខ គួរប្រញាប់ទៅជួបគ្រូពេទ្យជំនាញផ្នែកបេះដូងដើម្បីធ្វើរោគវិនិច្ឆ័យឱ្យបានច្បាស់លាស់៕