យោងតាមការចុះផ្សាយពីប្រភពបរទេស ទោះបីជាមើលទៅមានសេចក្តីសុខក្នុងក្រសែភ្នែកអ្នកដទៃ ប៉ុន្តែអ្នកម្ដាយគ្រប់រូបតែងតែជួបប្រទះនូវពេលវេលាដ៏តានតឹង ដែលធ្វើឱ្យអារម្មណ៍ដួលរលំស្ទើរទ្រាំពុំបាន។
ការបាក់ទឹកចិត្តនេះច្រើនតែកើតឡើងពីកិច្ចការតូចតាចក្នុងជីវិតប្រចាំថ្ងៃ ដូចជាការកំពប់ទឹកដោះគោនៅពេលផ្ទះបាយកំពុងរវល់ កូនភ្ញាក់យំនៅពេលទើបតែសម្រាកបានបន្តិច ឬកូនយំរករឿងទិញរបស់លេងនៅទីសាធារណៈជាដើម ដែលពេលខ្លះបង្កឱ្យមានការសង្ស័យលើខ្លួនឯង និងភាពអស់សង្ឃឹមយ៉ាងខ្លាំង។
ទោះជាយ៉ាងណា អារម្មណ៍ទន់ជ្រាយទាំងនោះត្រូវបានរំសាយទៅវិញយ៉ាងរហ័ស តាមរយៈភាពទន់ភ្លន់របស់កូនតូច ដូចជាពាក្យថា “ម៉ាក់អើយ កូនស្រឡាញ់ម៉ាក់” ឬស្នាមញញឹមពេលគេងលក់។
ទាំងនេះជាសារបញ្ជាក់ថាម្តាយមិនមែនជាមនុស្សយន្តទេ ម៉ាក់ក៏ជាមនុស្សធម្មតាដែលមានអារម្មណ៍នឿយហត់ និងការឈឺចាប់។ ភាពដួលរលំបណ្តោះអាសន្នមិនមែនមានន័យថាមិនស្រឡាញ់កូន ឬជាម្ដាយមិនល្អនោះឡើយ។ អ្វីដែលសំខាន់បំផុតគឺត្រូវចេះផ្ដល់ពេលវេលា និងការថែទាំផ្លូវចិត្តសម្រាប់ខ្លួនឯងខ្លះ ព្រោះដំណើរកំដរការលូតលាស់របស់កូនគឺជាដំណើរនៃការរៀនសូត្រ ជួបការលំបាក និងការកសាងភាពរឹងមាំជាមួយគ្នា៕