យោងតាមការចុះផ្សាយពីប្រភពបរទេស បុរសអាយុ ៣២ឆ្នាំម្នាក់បានរងរបួសបាក់ឆ្អឹងកំភួនជើងទាំងសងខាងបន្ទាប់ពីចាប់ផ្ដើមរត់ហាត់ប្រាណកម្រិតធ្ងន់ ៦គីឡូម៉ែត្រក្នុងមួយថ្ងៃជាប់គ្នា ៥ថ្ងៃ ទាំងដែលជាអ្នកអង្គុយធ្វើការយូរនិងខ្វះការហាត់ប្រាណ។ សកម្មភាពភ្លាមៗនេះបានធ្វើឱ្យឆ្អឹងទទួលរងនូវទម្ងន់និងការកន្ត្រាក់ខ្លាំងលើសកម្រិតទ្រាំទ្រ បណ្ដាលឱ្យខូចខាតរចនាសម្ព័ន្ធឆ្អឹងផ្នែកខាងក្នុង។
ក្រុមមនុស្សពីរក្រុមដែលត្រូវប្រុងប្រយ័ត្នខ្ពស់រួមមាន អ្នកដែលលេងកីឡា ឬរត់ចម្ងាយឆ្ងាយខ្លាំងជាប្រចាំ និងអ្នកដែលអង្គុយធ្វើការយូរស្ទើរគ្មានសកម្មភាពរាងកាយ ព្រោះឆ្អឹងងាយនឹងរងគ្រោះថ្នាក់នៅពេលចាប់ផ្ដើមហាត់ប្រាណខ្លាំងភ្លាមៗ។
ការហាត់ប្រាណត្រូវធ្វើឡើងជាសន្សឹមៗ និងបង្កើនកម្រិតបន្តិចម្ដងៗ។ ប្រសិនបើមានអាការឈឺចុកចាប់ខុសធម្មតាត្រង់ក្បាលជង្គង់ ឬកំភួនជើងក្រោយពេលហាត់ប្រាណ មិនត្រូវបន្តលាក់ទុកឬប្រងើយកន្តើយឡើយ គឺត្រូវសម្រាកនិងស្វែងរកការពិនិត្យពីគ្រូពេទ្យជំនាញ៕