នៅក្នុងពិភពលោកដ៏មមាញឹកនាពេលបច្ចុប្បន្ន មនុស្សជាច្រើនកំពុងតែលះបង់ពេលវេលាគេង ដើម្បីដោះដូរយកការងារ លុយកាក់ ឬការកម្សាន្តផ្សេងៗ។ ប៉ុន្តែ មានមនុស្សមួយក្រុមធំទៀត ដែលចង់គេង បែរជាគេងមិនលក់ទៅវិញ។ ពួកគាត់ត្រូវដេកននៀល ឱបភាពស្ងប់ស្ងាត់ទាំងធុញថប់ និងទន្ទឹងរង់ចាំមើលពន្លឺព្រះអាទិត្យរះឡើងទាំងភ្នែកស្លក់។
ប្រសិនបើអ្នកកំពុងស្ថិតក្នុងស្ថានភាពបែបនេះ ចូរដឹងថា «ការគេងមិនលក់» មិនមែនជារឿងធម្មតាដែលអាចមើលរំលងបានឡើយ។ វាប្រៀបដូចជាមេរោគសង្រ្គប់ស្ងៀម ដែលកំពុងតែលួចបំផ្លាញសុខភាព និងលេបត្របាក់អាយុជីវិតរបស់អ្នកបន្តិចម្តងៗដោយមិនដឹងខ្លួន។
+គ្រោះថ្នាក់ស្ងាត់ៗ៖ តើការគេងមិនលក់កំពុងធ្វើអ្វីខ្លះដល់រាងកាយអ្នក?
-បំផ្លាញខួរក្បាល និងស្មារតី៖ នៅពេលអ្នកអត់ងងុយរ៉ាំរ៉ៃ ខួរក្បាលនឹងចាប់ផ្តើមស្ពឹកស្រពន់ ការចងចាំចុះខ្សោយ និងបាត់បង់ការផ្តោតអារម្មណ៍។ វាធ្វើឱ្យអ្នកងាយសម្រេចចិត្តខុសឆ្គង ស្មុគស្មាញ និងបង្កើនហានិភ័យនៃជំងឺបាក់ទឹកចិត្ត (Depression) ខ្ពស់បំផុត។
-វាយប្រហារប្រព័ន្ធការពាររាងកាយ៖ ពេលវេលាគេង គឺជាពេលដែលរាងកាយ «ជួសជុល» និងផលិតកោសិកាការពារខ្លួន។ បើគ្មានការសម្រាកគ្រប់គ្រាន់ទេ ប្រព័ន្ធការពាររបស់អ្នកនឹងទ្រុឌទ្រោម ធ្វើឱ្យអ្នកងាយឆ្លងជំងឺផ្សេងៗ និងងាយហត់នឿយខុសធម្មតា។
-បង្កើតហានិភ័យនៃជំងឺរ៉ាំរ៉ៃ៖ ការគេងមិនលក់ធ្វើឱ្យអរម៉ូនក្នុងរាងកាយប្រែប្រួល ដែលជាដើមហេតុជម្រុញឱ្យកម្រិតជាតិស្ករក្នុងឈាមឡើងខ្ពស់ ឡើងសម្ពាធឈាម និងបង្កើនគ្រោះថ្នាក់នៃជំងឺបេះដូង សរសៃឈាមខួរក្បាល និងការធាត់ដុះក្បាល។
វិធីសាស្ត្រទាញយក «ដំណេកផ្អែមល្ហែម» ត្រឡប់មកវិញ
ដើម្បីកុំឱ្យបញ្ហានេះបន្តបំផ្លាញអនាគតរបស់អ្នក ចូរចាប់ផ្តើមអនុវត្តទម្លាប់ទាំងនេះចាប់ពីយប់នេះតទៅ៖
-បិទអេក្រង់មុនគេង ៣០ នាទី៖ ពន្លឺខៀវពីទូរស័ព្ទដៃ កុំព្យូទ័រ ឬទូរទស្សន៍ គឺជាសត្រូវចម្បងដែលរារាំងខួរក្បាលមិនឱ្យផលិតអរម៉ូនគេងលក់ (Melatonin)។ ចូរជំនួសមកវិញដោយការអានសៀវភៅ ឬស្តាប់តន្ត្រីស្រាលៗ។
-បង្កើតកាលវិភាគគេងឱ្យទៀងទាត់៖ ចូរចូលគេង និងក្រោកពីគេងឱ្យចំម៉ោងដដែលៗរាល់ថ្ងៃ (ទោះជាថ្ងៃឈប់សម្រាកក៏ដោយ) ដើម្បីឱ្យទ្រនិចនាឡិកាជីវសាស្ត្រក្នុងរាងកាយដើរបានត្រឹមត្រូវ។
-រៀបចំបន្ទប់គេងឱ្យមានផាសុកភាព៖ ត្រូវប្រាកដថាបន្ទប់គេងរបស់អ្នកមានភាពងងឹតល្អ ស្ងាត់ និងមានសីតុណ្ហភាពត្រជាក់ល្មម ដែលជួយឱ្យរាងកាយងាយស្រួលសម្រាកចិត្ត។
-ចៀសវាងអាហារធ្ងន់ៗ និងជាតិកាហ្វេអ៊ីន៖ កុំញ៉ាំអាហារដែលឆ្អែតខ្លាំងពេកមុនពេលគេង និងត្រូវកាត់បន្ថយការផឹកកាហ្វេ ឬតែនៅពេលរសៀល ព្រោះវាធ្វើឱ្យក្រពះ និងខួរក្បាលត្រូវធ្វើការទាំងបង្ខំ។
-អនុវត្តការដើរតិចៗពេលល្ងាច៖ ការធ្វើលំហាត់ប្រាណស្រាលៗ ឬការដើរលំហែកាយបន្ទាប់ពីអាហារល្ងាច ជួយកាត់បន្ថយភាពតានតឹងក្នុងខួរក្បាល និងធ្វើឱ្យរាងកាយងាយស្រួលទម្រេតខ្លួនគេងលក់បានស្កប់ស្កល់។
«ឈប់ដោះដូរសុខភាពដើម្បីការងារ ហើយក៏ឈប់យកពេលយប់មកបារម្ភពីថ្ងៃស្អែកដែរ។» ចូរស្រឡាញ់ខ្លួនប្រាណរបស់អ្នក ដោះលែងរាល់ក្តីកង្វល់ទាំងឡាយ រួចផ្តល់ឱកាសឱ្យខ្លួនឯងបានសម្រាកពេញលេញចាប់ពីយប់នេះទៅ! ៕