មនុស្សភាគច្រើនតែងតែរវល់នឹងការស្វែងរកប្រាក់ចំណូល និងការកសាងអនាគត រហូតភ្លេចគិតថា «សុខភាព គឺជាទ្រព្យសម្បត្តិធំបំផុត»។ យើងតែងតែគិតថាខ្លួនឯងនៅក្មេង នៅរឹងមាំ មិនអីឡើយ! ប៉ុន្តែសរីរាង្គក្នុងកាយមិនបានគិតដូចយើងទេ។ ជំងឺភាគច្រើនមិនបានមកកាត់ទ្វារប្រាប់យើងមុនឡើយ វាសម្ងំខ្លួនយ៉ាងស្ងៀមស្ងាត់តាមរយៈទម្លាប់តូចតាចប្រចាំថ្ងៃរបស់យើង។
កុំចាំទាល់តែដេកលើគ្រែពេទ្យ ឬទាល់តែឈាមស្រក់ ទើបស្តាយក្រោយ! ខាងក្រោមនេះជា ៥ ទម្លាប់បំផ្លាញសុខភាពស្ងាត់ៗ ដែលអ្នកប្រហែលជាកំពុងធ្វើរាល់ថ្ងៃដោយមិនដឹងខ្លួន៖
១. អង្គុយធ្វើការយូរពេក (ឃាតករស្ងៀមស្ងាត់នៃការិយាល័យ)
ការអង្គុយនៅមួយកន្លែងលើសពី ៦ ទៅ ៨ ម៉ោងក្នុងមួយថ្ងៃ ដោយមិនបានងើបប្តូរឥរិយាបថ គឺមិនខុសពីការដាក់គុកសរីរាង្គខ្លួនឯងឡើយ។ វាជាដើមហេតុចម្បងនៃ «រោគសញ្ញាការិយាល័យ» (Office Syndrome) ដែលបណ្តាលឱ្យចុកស្មា រឹងក ឈឺចង្កេះ រហូតដល់ប៉ះពាល់ដល់សរសៃប្រសាទ និងប្រព័ន្ធរំលាយអាហារ។
+ ដំណោះស្រាយ៖ អនុវត្តច្បាប់ ២០-៣០ គឺអង្គុយធ្វើការ ៣០ នាទី ត្រូវងើបឈរ ឬដើរពត់ខ្លួន ២ រយៈពេល ១ ទៅ ២ នាទី។
២. ញ៉ាំបណ្តើរ អូសទូរស័ព្ទបណ្តើរ (ការបំផ្លាញប្រព័ន្ធរំលាយអាហារ)
វាក្លាយជាទម្លាប់ទៅហើយដែលដៃម្ខាងកាន់ស្លាបព្រា ដៃម្ខាងទៀតអូស Facebook, TikTok ឬ Telegram។ នៅពេលដែលខួរក្បាលផ្តោតលើអេក្រង់ វានឹងមិនបានបញ្ជាឱ្យក្រពះត្រៀមខ្លួនកិនរំលាយអាហារឱ្យបានល្អឡើយ។ ម្យ៉ាងទៀត ការញ៉ាំលឿនពេកដោយមិនបានទំពារឱ្យម៉ត់ នឹងធ្វើឱ្យក្រពះធ្វើការធ្ងន់ នាំឱ្យហើមពោះ ភើ រលាកក្រពះ និងធាត់ដុះក្បាលដោយមិនដឹងខ្លួន។
៣. បណ្តោយឱ្យរាងកាយ «ខ្សោះទឹក»
មនុស្សជាច្រើនចាំទាល់តែក្រហាយក ទើបដើរទៅរកទឹកញ៉ាំ។ តាមពិតទៅ នៅពេលដែលអ្នកមានអារម្មណ៍ថា «ស្រេកទឹក» នោះមានន័យថារាងកាយរបស់អ្នកបានចាប់ផ្តើមខ្សោះទឹកបាត់ទៅហើយ។ ការខ្វះទឹកធ្វើឱ្យឈាមរត់យឺត ខួរក្បាលស្ពឹកស្រពន់ ស្បែកជ្រីវជ្រួញ និងធ្វើឱ្យតម្រងនោមត្រូវធ្វើការហួសកម្លាំងក្នុងការចម្រោះកាកសំណល់។
៤. ទម្លាប់ចូលគេងយឺត (គិតថាខ្លួនឯងធន់ តែរាងកាយទ្រុឌទ្រោម)
«សុំមួយភាគទៀត… សុំអូសបន្តិចទៀត…» ពាក្យនេះតែងតែអូសបន្លាយម៉ោងគេងរបស់យើងរហូតដល់កណ្តាលអធ្រាត្រ។ ការគេងមិនគ្រាន់តែជាការសម្រាកទេ តែជាការ «ជួសជុល» សរីរាង្គដែលខូចខាត។ ការអត់ងងុយរ៉ាំរ៉ៃ នឹងបំផ្លាញប្រព័ន្ធការពាររាងកាយ ធ្វើឱ្យអ្នកងាយឆ្លងជំងឺ ស្មុគស្មាញ និងបង្កើនហានិភ័យនៃជំងឺបេះដូងខ្ពស់បំផុត។
៥. ការមើលរំលង «ការដើរបន្ទាប់ពីញ៉ាំអាហាររួច»
ក្រោយញ៉ាំបាយឆ្អែត ភាគច្រើនយើងតែងតែជ្រើសរើសការទម្រេតខ្លួន ឬអង្គុយលេងទូរស័ព្ទភ្លាមៗ។ ទម្លាប់នេះធ្វើឱ្យកម្រិតជាតិស្ករក្នុងឈាមហក់ឡើងខ្ពស់ និងធ្វើឱ្យខ្លាញ់កកកុញក្នុងសរីរាង្គ។ ការដើរតិចៗ ឬធ្វើចលនាស្រាលៗត្រឹមតែ ១០ ទៅ ១៥ នាទី បន្ទាប់ពីញ៉ាំអាហាររួច មានតម្លៃស្មើនឹងឱសថទិព្វក្នុងការសម្រួលដល់ការរំលាយអាហារ និងគ្រប់គ្រងជាតិស្ករ។