ពាក្យចចាមអារ៉ាមមួយចំនួនបានលើកឡើងថា ការចុចលេខកូដ ATM បញ្ច្រាស (បើលេខកូដរបស់អ្នក 1234 ត្រូវចុច 4321) អាចហៅប៉ូលិសមកជួយ នៅពេលមានជនខិលខូចគំរាមប្លន់យកលុយ។
ទោះជាយ៉ាងណា វាមិនមែនជាការពិតឡើយ ហើយគ្រាន់តែជាព័ត៌មានក្លែងក្លាយ ដែលបានរីករាលដាលពាសពេញបណ្ដាញអ៊ីនធឺណិត កាលពីឆ្នាំ២០០៦ ប៉ុណ្ណោះ។
កាលនោះ ព័ត៌មានក្លែងក្លាយបានលើកឡើងថា «ករណីដែលមានចោរចូលមកគំរាមប្លន់យកលុយ នៅក្នុងទូ ATM អ្នកគ្រាន់តែចុចលេខកូដបញ្ច្រាស គឺអាចហៅប៉ូលិសមកចាប់ចោរនោះបាន»។
ផ្ទុយទៅវិញ បើយោងតាមរបាយការណ៍ដែលចេញផ្សាយដោយ ភ្នាក់ងាររបស់រដ្ឋាភិបាល Federal Trade Commission (FTC) កាលពីឆ្នាំ២០១០ បានបញ្ជាក់ថា ទូ ATM មិនមានមុខងារនេះឡើយ។ ជាមួយគ្នានេះដែរ របាយការណ៍ខាងលើឲ្យដឹងថា ការដាក់មុខងារបែបនេះ ឬ ប៊ូតុងសម្រាប់ផ្ដល់ដំណឹងដល់សមត្ថកិច្ច មិនអាចឃាត់ ឬ ចាប់ជនល្មើសបានឡើយ មានតែបង្កជាហានិភ័យដល់អ្នកប្រើប្រាស់លើសដើមទៅវិញទេ។
តើនរណាជាអ្នកចាប់ផ្ដើមគំនិត «វាយលេខកូដ ATM បញ្ច្រាស» នេះឡើង?
លោក Joseph Zingher អ្នកជំនួញនៅទីក្រុង Chicago សហរដ្ឋអាមេរិក បាននឹកឃើញនូវមុខងារសុវត្ថិភាពនេះឡើង ឲ្យឈ្មោះថា «SafetyPIN»។
គំនិតរបស់លោក Joseph គឺ ការវាយលេខកូដបញ្ច្រាស នឹងក្លាយជាការផ្ដល់ដំណឹងសម្ងាត់មួយទៅកាន់ប៉ូលិសថា អ្នកប្រើប្រាស់ទូ ATM កំពុងជួបគ្រោះថ្នាក់។ អ្នកជំនួញខាងលើបានស្នើដាក់ប្រព័ន្ធនេះទៅសហគមន៍ធនាគារ អស់រយៈពេលជាច្រើនឆ្នាំ ប៉ុន្តែពួកគេមិនបានចាប់អារម្មណ៍ឡើយ៕
ប្រភព៖ sabay.com.kh