យោងតាមការចុះផ្សាយពីប្រភពបរទេស ជំងឺដាច់សរសៃឈាមខួរក្បាលកំពុងវិវត្តកាន់តែខ្លាំងលើមនុស្សវ័យក្មេង ដោយសារការរក្សាទម្លាប់រស់នៅមិនល្អចំនួន ៩យ៉ាង។
ការគេងយឺត ការស្ត្រេសខ្លាំង និងការបញ្ចេញអារម្មណ៍ខឹងសម្បារហួសហេតុ សុទ្ធតែជាកត្តាធ្វើឱ្យសម្ពាធឈាមកើនឡើង និងរំខានដល់ប្រព័ន្ធសរសៃឈាម។ ការមិនសូវផឹកទឹកនាំឱ្យឈាមខាប់ ចំណែកឯការញ៉ាំប្រៃខ្លាំង និងការធាត់ក្បាលពោះគឺជាកត្តាជំរុញឱ្យកើតជំងឺលើសឈាម និងបេះដូង។ លើសពីនេះ ការជក់បារី ការពិសាគ្រឿងស្រវឹង និងការអង្គុយយូរខ្វះការធ្វើលំហាត់ប្រាណ បានធ្វើឱ្យចរន្តឈាមដើរយឺត និងបង្កើនហានិភ័យខ្ពស់ដល់សុខភាពខួរក្បាល។
ដើម្បីការពារជីវិត អ្នកត្រូវចេះសម្គាល់សញ្ញាគ្រោះថ្នាក់ដូចជា ការបាត់បង់លំនឹង ការស្រវាំងភ្នែក វៀចមាត់ ខ្សោយដៃជើង និងការនិយាយមិនច្បាស់។ នៅពេលឃើញសញ្ញាទាំងនេះ សូមប្រញាប់ហៅលេខសង្គ្រោះបន្ទាន់ ឬបញ្ជូនអ្នកជំងឺទៅកាន់មន្ទីរពេទ្យភ្លាមៗជាការល្អបំផុត៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕