«ការគេង» គឺជាសសរទ្រូងដ៏សំខាន់បំផុតមួយនៃសុខភាព ប៉ុន្តែនៅក្នុងសម័យឌីជីថលបច្ចុប្បន្ន មនុស្សជាច្រើនកំពុងជួបប្រទះនឹងបញ្ហាគេងមិនលក់ ឬគេងមិនស្កប់ស្កល់ ដែលបណ្តាលមកពីស្រ្តេស ការងារ និងការប្រើប្រាស់ទូរស័ព្ទដៃយឺតយ៉ាវនៅពេលយប់។ ការអត់ងងុយ ឬគេងមិនគ្រប់គ្រាន់ មិនត្រឹមតែធ្វើឱ្យរាងកាយហត់នឿយនៅថ្ងៃបន្ទាប់នោះទេ តែវាក៏ជាដើមហេតុនៃជំងឺបាក់ទឹកចិត្ត និងជំងឺរ៉ាំរ៉ៃផ្សេងៗទៀតផង។
ប្រសិនបើបងកំពុងតែជួបប្រទះនឹងអាការៈប្រែប្រួលខ្លួនចុះឡើងនៅលើគ្រែ ហើយនៅតែគេងមិនលក់ សាកល្បងអនុវត្តតាមវិធីសាស្ត្រតាមបែបបច្ចេកទេស និងវិទ្យាសាស្ត្រសុខភាពខាងក្រោមនេះ ដើម្បីទទួលបានការសម្រាកដ៏ស្កប់ស្កល់៖
១. បង្កើត «វិន័យឌីជីថល» មុនពេលចូលគេង
ឧបករណ៍អេឡិចត្រូនិច គឺជាសត្រូវលាក់មុខនៃដំណេករបស់អ្នក៖
-បិទអេក្រង់ទូរស័ព្ទដៃ ៣០ ទៅ ៦០ នាទីមុនគេង៖ ពន្លឺពណ៌ខៀវ (Blue Light) ពីអេក្រង់ទូរស័ព្ទ ឬកុំព្យូទ័រ នឹងទៅទប់ស្កាត់ការបញ្ចេញអរម៉ូន Melatonin (អរម៉ូនដែលជួយឱ្យរាងកាយងងុយគេង)។ ការទុកទូរស័ព្ទឱ្យឆ្ងាយពីដៃ មុនពេលចូលគេង នឹងជួយឱ្យខួរក្បាលចាប់ផ្តើមសម្រាក។
-ជៀសវាងការអានព័ត៌មានដែលស្ត្រេស៖ ការអានព័ត៌មានរកាំរកូស ឬការគិតគូររឿងការងារ រឿងលុយកាក់នៅពេលយប់ ធ្វើឱ្យប្រព័ន្ធប្រសាទភ្ញោចខ្លាំង។ គួរជំនួសមកវិញនូវការស្តាប់តន្ត្រីស្រាលៗ បែបសម្រាលអារម្មណ៍។
២. រៀបចំបរិស្ថានបន្ទប់គេងឱ្យត្រូវតាមបច្ចេកទេស
បរិស្ថានជុំវិញខ្លួនមានឥទ្ធិពលខ្លាំងណាស់ក្នុងការជម្រុញឱ្យរាងកាយចង់សម្រាក៖
-គ្រប់គ្រងពន្លឺ និងសីតុណ្ហភាព៖ បន្ទប់គេងគួរតែមានសភាពងងឹតល្អ ស្ងាត់ និងមានខ្យល់អាកាសត្រជាក់ល្មម (មិនក្តៅពេក ហើយក៏មិនត្រជាក់ពេក)។
-កុំប្រើគ្រែសម្រាប់ធ្វើការ៖ គួរប្រើប្រាស់គ្រែសម្រាប់តែការគេង និងការសម្រាកប៉ុណ្ណោះ។ ជៀសវាងការយកកុំព្យូទ័រមកអង្គុយធ្វើការលើគ្រែ ព្រោះវាធ្វើឱ្យខួរក្បាលចំណាំថា ទីកន្លែងនោះជាកន្លែងតានតឹង មិនមែនជាកន្លែងសម្រាកឡើយ។
៣. អនុវត្តបច្ចេកទេសដកដង្ហើម «៤-៧-៨»
នេះជាវិធីសាស្ត្រដ៏ល្បីល្បាញលើពិភពលោក បង្កើតឡើងដោយវេជ្ជបណ្ឌិតមកពីសាកលវិទ្យាល័យ Harvard ដែលវាជួយសម្រាលប្រព័ន្ធប្រសាទ និងកាត់បន្ថយភាពតានតឹងក្នុងរយៈពេលតែប៉ុន្មាននាទី៖
-ដកដង្ហើមចូល តាមច្រមុះយឺតៗ ដោយរាប់ក្នុងចិត្តពី ១ ដល់ ៤។
-ទប់ដង្ហើម របស់អ្នកទុក ដោយរាប់ក្នុងចិត្តពី ១ ដល់ ៧។
-ដកដង្ហើមចេញ តាមមាត់យឺតៗឱ្យអស់ ដោយធ្វើសំឡេង «ស៊ូ» ហើយរាប់ក្នុងចិត្តពី ១ ដល់ ៨។ ធ្វើបែបនេះឡើងវិញឱ្យបាន ៤ ទៅ ៥ ដង បងនឹងមានអារម្មណ៍ថា រាងកាយចាប់ផ្តើមធូរស្រាល និងងងុយគេងភ្លាមៗ។
៤. របបអាហារ និងទម្លាប់គាំទ្រពេលថ្ងៃ
អ្វីដែលបងធ្វើនៅពេលថ្ងៃ គឺជារឿងកំណត់គុណភាពនៃការគេងនៅពេលយប់៖
-កាត់បន្ថយជាតិកាហ្វេអ៊ីន៖ ជៀសវាងការញ៉ាំកាហ្វេ ឬតែក្រាស់ៗនៅពេលរសៀល (ចាប់ពីម៉ោង ២ រសៀលឡើងទៅ) ព្រោះជាតិកាហ្វេអ៊ីនអាចស្ថិតនៅក្នុងរាងកាយរហូតដល់ទៅ ៦-៨ ម៉ោង។
-ទម្លាប់ដើរហាត់ប្រាណ៖ ការដើរហាត់ប្រាណស្រាលៗ ឬការធ្វើកាតឌីអូនៅពេលព្រឹក និងពេលល្ងាច ជួយឱ្យរាងកាយបញ្ចេញថាមពល និងជួយឱ្យគេងលក់បានស្កប់ស្កល់នៅពេលយប់។ ប៉ុន្តែ ជៀសវាងការហាត់ប្រាណធ្ងន់ៗនៅកៀកម៉ោងចូលគេងពេក។
-ទឹកក្តៅឧណ្ហៗ៖ ការញ៉ាំទឹកក្តៅឧណ្ហៗ ១កែវតូច មុនពេលចូលគេង ៣០នាទី ក៏ជួយសម្រួលដល់សាច់ដុំ និងប្រព័ន្ធរំលាយអាហារឱ្យមានភាពកក់ក្តៅ និងងាយស្រួលលង់លក់ផងដែរ។