នៅក្នុងជីវិតរស់នៅប្រចាំថ្ងៃ ការហត់នឿយ អស់កម្លាំង ឬធេងធោង ជារឿងសាមញ្ញមួយដែលកើតឡើងបន្ទាប់ពីយើងធ្វើការធ្ងន់ គេងមិនគ្រប់គ្រាន់ ឬស្រ្តេសខ្លាំង។ ទោះជាយ៉ាងណា អាការៈអស់កម្លាំងល្ហិតល្ហៃមួយចំនួន មិនមែនមកពីការហត់នឿយធម្មតានោះទេ ប៉ុន្តែវាជាសម្រែកព្រមានដ៏គ្រោះថ្នាក់នៃ «ជំងឺដាច់ឬស្ទះសរសៃឈាមខួរក្បាល» (Stroke)។
ការភ័ន្តច្រឡំ និងការគិតថា «គ្រាន់តែហត់បន្តិចបន្តួច ដេកសម្រាកទៅក៏បាត់» គឺជាមូលហេតុចម្បងដែលធ្វើឱ្យមនុស្សជាច្រើនបាត់បង់ឱកាសមាសក្នុងការសង្គ្រោះជីវិត។ តើធ្វើដូចម្តេចទើបអាចបែងចែកអាការៈទាំងពីរនេះដាច់ពីគ្នាបាន?
វិធីសង្កេត និងបែងចែកឱ្យច្បាស់លាស់
ដើម្បីកុំឱ្យមានការយល់ច្រឡំ ចូរពិនិត្យមើលការប្រៀបធៀបរវាងអាការៈទាំងពីរខាងក្រោមនេះ៖
១. ភាពខុសគ្នានៃការអស់កម្លាំង និងទន់ដៃទន់ជើង
-ហត់នឿយធម្មតា ៖ អ្នកមានអារម្មណ៍ល្ហិតល្ហៃពេញរាងកាយ មិនចង់កម្រើកខ្លួន ឬអស់កម្លាំងដៃជើងទាំងសងខាងស្មើគ្នា។ បន្ទាប់ពីបានញ៉ាំអាហារផ្អែមៗ ផឹកទឹក ឬបានគេងសម្រាកមួយភ្សាំង ថាមពលរបស់អ្នកនឹងចាប់ផ្តើមត្រឡប់មកវិញ។
-សញ្ញា Stroke៖ មិនមែនជាការអស់កម្លាំងធម្មតាទេ ប៉ុន្តែវាជា «ការទន់ខ្សោយ ឬស្ពឹកស្រពន់ដាច់ដោយឡែកតែម្ខាងនៃរាងកាយ» (ស្ពឹកដៃឆ្វេង-ជើងឆ្វេង ឬដៃស្តាំ-ជើងស្តាំ)។ អ្នកស្រាប់តែលើកដៃម្ខាងមិនរួច កាន់កែវទឹកជ្រុះ ឬដើរទ្រេតទៅម្ខាងភ្លាមៗ ទោះបីជាអ្នកមិនបានធ្វើការធ្ងន់ក៏ដោយ។
២. ភាពខុសគ្នានៃការវិលមុខ និងការវង្វេងវង្វាន់
-ហត់នឿយធម្មតា៖ វិលមុខស្រាលៗ ធេងធោង ដូចខ្វះជាតិស្ករ ឬមកពីអាកាសធាតុក្តៅ។ នៅពេលអ្នកអង្គុយចុះ ឬដកដង្ហើមវែងៗ វានឹងធូរស្រាលបន្តិចម្តងៗ។
-សញ្ញា Stroke៖ ស្រាប់តែវិលមុខខ្លាំងភ្លាមៗ រក្សាលំនឹងខ្លួនមិនបាន ដើរមិនត្រង់ផ្លូវ អមដោយការមើលឃើញព្រិលៗ ឬឃើញរូបភាពបែកជាពីរ (Double vision) ដោយគ្មានមូលហេតុ។
៣. ភាពខុសគ្នានៃការនិយាយស្តី និងការប្រើប្រាស់ខួរក្បាល
-ហត់នឿយធម្មតា៖ គិតអីមិនសូវចេញ និយាយខុសពាក្យខ្លះៗដោយសារខួរក្បាលហត់នឿយ (Brain fog) តែនៅតែអាចនិយាយស្តាប់គ្នាបានធម្មតា និងយល់ពីអ្វីដែលអ្នកដទៃនិយាយ។
-សញ្ញា Stroke៖ ស្រាប់តែ «អណ្តាតរឹង និយាយមិនច្បាស់ពាក្យ» និយាយឡុលៗ ឬស្រាប់តែវង្វេងវង្វាន់ មិនយល់ពាក្យសម្តីដែលអ្នកដទៃនិយាយទាល់តែសោះ ទោះបីជាមុននោះបន្តិចកំពុងនិយាយលេងធម្មតាក៏ដោយ។
៤. ភាពខុសគ្នានៃការឈឺក្បាល
-ហត់នឿយធម្មតា៖ ឈឺក្បាលខ្ទប់ៗ ឬតានតឹងត្រង់កញ្ចឹងក និងសងខាងស្មារបស់អ្នក ដោយសារសម្ពាធការងារ ឬការសម្លឹងអេក្រង់យូរ។
-សញ្ញា Stroke៖ ស្រាប់តែ «ឈឺក្បាលខ្លាំងភ្លាមៗដូចរន្ទះបាញ់» (Sudden severe headache) ដែលជាការឈឺក្បាលខ្លាំងបំផុតក្នុងជីវិត មិនធ្លាប់ជួបប្រទះពីមុនមក ដែលនេះជាសញ្ញានៃការដាច់សរសៃឈាមខួរក្បាល។