មានការភ្ញាក់ផ្អើល និងផ្ទុះការរិះគន់ជាខ្លាំង ពីអ្នកលេងបណ្ដាញសង្គមនៅក្នុងប្រទេសកម្ពុជា បន្ទាប់ពីរូបភាពមួយសន្លឹកធ្លាយ បង្ហាញពីការគេងលង់លក់របស់មន្ត្រីនគរបាល៣រូប មកខេត្តកំពង់ចាម ចេញពីកម្មវិធី អបអរសាទរខួបលើកទី១១ ទិវាអតីតយុទ្ធជនកម្ពុជា នៅព្រឹកថ្ងៃទី០៤ ខែមិថុនា ឆ្នាំ២០១៨ នៅសាលសន្និសីទកោះពេជ្រ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ មានអ្នកលេងបណ្ដាញសង្គមជាច្រើនបានវិនិច្ឆ័យទៅតាមការយល់ឃើញរៀងៗខ្លួន។
បន្ទាប់ពីរូបភាពនោះ បានចែកចាយយ៉ាងផុលផុសនៅថ្ងៃទី ៤ ខែមិថុនា ឆ្នាំ២០១៨ ម្សិលមិញនេះ ស្នងការដ្ឋាននគរបាលខេត្តកំពង់ចាម បានបកស្រាយថា មន្ត្រីនគរបាលទាំង៣រូបនោះ ក៏ដូចមន្ត្រីប៉ុស្តិ៍នគរបាលរដ្ឋបាលដទៃទៀតក្នុងស្រុកស្រីសន្ធរ បានចេញល្បាតការពាររហូតដល់ម៉ោង១រំលងអធ្រាត្រហើយដល់ម៉ោង២បានចេញដំណើរទៅចូលរួមកម្មវិធី។ ហេតុនេះហើយបានជាទម្រេតខ្លួនបន្តិចមែន តែការទម្រេតខ្លួនរបស់ពួកគាត់នេះ គឺនៅមុនពេលកម្មវិធីចាប់ផ្ដើម។ បានន័យថាគឺពេលរង់ចាំ មិនមែនសម្រាន្តក្នុងពេលដែលសម្ដេច ថ្លែងសន្ទរកថានោះទេ នៅពេលដែលសម្ដេចអញ្ជើញមកដល់ និងបើកកម្មវិធី គឺពួកគាត់មិនបានសម្រាន្តឡើយ។
ស្នងការនគរបាលខេត្តកំពង់ចាម បានសំណូមពរដល់បងប្អូនសាធារណជន និងបណ្តាញសង្គម Facebook ទាំងអស់មេត្តាជួយកែតម្រូវអត្ថបទ និងការបរិយាយដែលធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយសបុគ្គលក៏ដូចជាសេចក្តីថ្លៃថ្នូររបស់មន្ត្រីនគរបាលជាតិទាំងមូល៕
ប្រភព៖ sabay.com.kh