នៅក្នុងរបៀបរស់នៅដ៏មមាញឹកនាពេលបច្ចុប្បន្ន ភេសជ្ជៈប៉ូវកម្លាំង និងកាហ្វេ បានក្លាយជា «មិត្តភក្តិជិតស្និទ្ធ» របស់មនុស្សជាច្រើន ដើម្បីបណ្តេញភាពងងុយគេង និងបង្កើនថាមពលខួរក្បាលសម្រាប់ការងារ និងការសិក្សា។ នៅក្នុងភេសជ្ជៈទាំងនេះ មានផ្ទុកសារធាតុសកម្មមួយឈ្មោះថា កាហ្វេអ៊ីន (Caffeine) ដែលជាភ្នាក់ងាររំញោចប្រព័ន្ធប្រសាទកណ្តាល។
ទោះជាយ៉ាងណា ការទទួលទានជាតិកាហ្វេអ៊ីនច្រើនហួសប្រមាណ ឬខុសរបៀប អាចបង្កជាផលវិបាកធ្ងន់ធ្ងរដល់បេះដូង ដូចជាធ្វើឱ្យចង្វាក់បេះដូងលោតខុសប្រក្រតី (លោតញាប់ពេក) ញ័រទ្រូង ឡើងសម្ពាធឈាម និងអាចគ្រោះថ្នាក់ដល់ជីវិតជាយថាហេតុ។
តើត្រូវប្រើប្រាស់បែបណា ទើបអាចទទួលបានខួរក្បាលស្រឡះ តែមិនបំផ្លាញបេះដូង?
១. ស្គាល់ពី «កម្រិតសុវត្ថិភាព» នៃជាតិកាហ្វេអ៊ីនប្រចាំថ្ងៃ
យោងតាមការណែនាំពីអ្នកជំនាញសុខភាព និងរដ្ឋបាលចំណីអាហារ និងឱសថ (FDA)៖
-កម្រិតសុវត្ថិភាពសម្រាប់មនុស្សពេញវ័យ៖ មិនគួរលើសពី ៤០០ មីលីក្រាម (mg) ក្នុងមួយថ្ងៃ ឡើយ (ប្រហែលជាកាហ្វេខ្មៅ ៣ ទៅ ៤ ពែង)។
-ការព្រមាន៖ ភេសជ្ជៈប៉ូវកម្លាំង ១ កំប៉ុង អាចមានជាតិកាហ្វេអ៊ីនចាប់ពី ៨០mg រហូតដល់ ៣០០mg (អាស្រ័យលើម៉ាកសញ្ញា)។ ប្រសិនបើអ្នកញ៉ាំភេសជ្ជៈប៉ូវកម្លាំងផង និងកាហ្វេផងក្នុងថ្ងៃតែមួយ អ្នកនឹងលើសកម្រិតសុវត្ថិភាពភ្លាមៗ។
២. កុំពិសារប្តូរផ្តាច់ ឬពិសារលឿនពេក
ការអក ឬក្រេបភេសជ្ជៈប៉ូវកម្លាំង ឬកាហ្វេក្នុងបរិមាណច្រើនភ្លាមៗ ធ្វើឱ្យជាតិកាហ្វេអ៊ីនជ្រាបចូលទៅក្នុងឈាមលឿនពេក។ វានឹងទៅរំញោចក្រពេញ Adrenal ឱ្យបញ្ចេញអ័រម៉ូនស្ត្រេស ដែលធ្វើឱ្យបេះដូងរបស់អ្នករងសម្ពាធភ្លាមៗ រហូតមានអារម្មណ៍ថា ញ័រទ្រូង ថប់ដង្ហើម ឬចុកទ្រូង។ ចូរពិសារថ្នមៗ និងទុកចន្លោះពេលឱ្យរាងកាយបន្ស៊ាំខ្លួន។
៣. ជៀសវាងការពិសារមុនពេលធ្វើការងារធ្ងន់ ឬហាត់ប្រាណ
មនុស្សជាច្រើនមានទម្លាប់ញ៉ាំភេសជ្ជៈប៉ូវកម្លាំងមុនពេលលេងកីឡា ឬហាត់ប្រាណព្រោះគិតថាវាជួយឱ្យមានកម្លាំង។ ប៉ុន្តែ នេះជាទម្លាប់ដ៏គ្រោះថ្នាក់បំផុត! នៅពេលអ្នកហាត់ប្រាណ ចង្វាក់បេះដូងរបស់អ្នកត្រូវកើនឡើងជាធម្មជាតិទៅហើយ។ ប្រសិនបើបន្ថែមជាតិកាហ្វេអ៊ីន និងសារធាតុរំញោចផ្សេងទៀត (ដូចជា Taurine) ពីភេសជ្ជៈប៉ូវកម្លាំង វានឹងរុញឱ្យបេះដូងធ្វើការលើសកម្លាំង និងអាចបង្កឱ្យមាន ការគាំងបេះដូងភ្លាមៗ (Sudden Cardiac Arrest)។
៤. កុំពិសារនៅពេលពោះទទេ និងត្រូវរក្សាជាតិទឹក
ការញ៉ាំកាហ្វេ ឬភេសជ្ជៈប៉ូវកម្លាំងនៅពេលព្រឹកទាំងមិនទាន់បានញ៉ាំអាហារ ធ្វើឱ្យជាតិកាហ្វេអ៊ីនស្រូបចូលកាន់តែលឿន និងងាយធ្វើឱ្យញ័រទ្រូងជាងធម្មតា។ ម្យ៉ាងទៀត កាហ្វេអ៊ីនមានសារធាតុបញ្ចុះទឹកនោម ដែលធ្វើឱ្យរាងកាយបាត់បង់ជាតិទឹក។ ការខ្វះជាតិទឹក ធ្វើឱ្យឈាមខាប់ ហើយបេះដូងត្រូវប្រឹងបូមឈាមខ្លាំងជាងមុន។ ដូច្នេះ ត្រូវញ៉ាំទឹកស្អាតឱ្យបានច្រើនអមជាមួយ។
៥. កំណត់ពេលវេលាពិសារឱ្យបានត្រឹមត្រូវ
ជាតិកាហ្វេអ៊ីនអាចស្ថិតនៅក្នុងរាងកាយរបស់អ្នកចាប់ពី ៥ ទៅ ៦ ម៉ោង មុនពេលវាថយចុះពាក់កណ្តាល។ ដើម្បីកុំឱ្យប៉ះពាល់ដល់ដំណេក និងចង្វាក់បេះដូងពេលយប់ អ្នកមិនគួរពិសារកាហ្វេ ឬភេសជ្ជៈប៉ូវកម្លាំងក្រោយម៉ោង ២ រសៀលឡើយ។ ការគេងមិនលក់ដែលបណ្តាលមកពីកាហ្វេអ៊ីន នឹងធ្វើឱ្យបេះដូងមិនបានសម្រាក និងបង្កើនហានិភ័យជំងឺបេះដូងនៅថ្ងៃខាងមុខ។
«កម្រិតស្តង់ដារ បង្កើតថាមពល; កម្រិតហួសប្រមាណ បង្កើតគ្រោះថ្នាក់» ភេសជ្ជៈប៉ូវកម្លាំង និងកាហ្វេ មិនមែនជាថ្នាំពុលនោះទេ ប្រសិនបើយើងចេះប្រើប្រាស់វាដោយប្រាជ្ញា និងស្មារតីទទួលខុសត្រូវ ។ ចូរមកស្តាប់សញ្ញាព្រមានពីរាងកាយរបស់អ្នក។
+សញ្ញាព្រមានដែលប្រាប់ថា បេះដូងរបស់អ្នកកំពុងលើសជាតិកាហ្វេអ៊ីន៖
-មានអារម្មណ៍ថាបេះដូងលោតខុសចង្វាក់ (លោតខក ឬលោតញាប់ខុសធម្មតា)។
-ញ័រដៃជើង អន្ទះអន្ទែង និងរំជើបរំជួលខុសប្រក្រតី។
-វិលមុខ ថប់ដង្ហើម ឬចង់ក្អួត។
ប្រសិនបើអ្នកជួបប្រទះសញ្ញាទាំងនេះ ចូរផ្អាកការពិសារភ្លាមៗ ងាកមកញ៉ាំទឹកស្អាតឱ្យបានច្រើន ហើយសម្រាកដកដង្ហើមវែងៗ។ ប្រសិនបើអាការៈមិនធូរស្រាល ត្រូវប្រញាប់ទៅជួបគ្រូពេទ្យជំនាញជាបន្ទាន់ ។ ចូរស្រឡាញ់បេះដូងរបស់អ្នក ដោយការកម្រិតរាល់អ្វីដែលអ្នកពិសារនៅថ្ងៃនេះ ដើម្បីសុខភាព និងអាយុជីវិតដ៏វែងអនាគត! បេះដូងរឹងមាំ ជីវិតស្រស់ថ្លា ៕