មនុស្សជាច្រើនតែងឆ្ងល់ថា ហេតុអ្វីបានជាខ្លួនឯងខំប្រឹងតមអាហារ និងហាត់ប្រាណយ៉ាងណា ក៏ទម្ងន់នៅតែមិនព្រមស្រក ឬថែមទាំងកើនឡើងទៅវិញ? ចម្លើយអាចមកពី «ទម្លាប់ពេលព្រឹក» មួយចំនួនដែលអ្នកគិតថាធម្មតា ប៉ុន្តែវាគឺជាសត្រូវលាក់មុខដែលកំពុងបំផ្លាញប្រព័ន្ធដុតរំលាយអាហាររបស់អ្នក។
សូមពិនិត្យមើលទម្លាប់ពេលព្រឹកទាំង ៣ ខាងក្រោមនេះ ដើម្បីកែប្រែជាបន្ទាន់៖
១. មិនព្រមញ៉ាំអាហារពេលព្រឹក ឬញ៉ាំមិនត្រូវពេល
មនុស្សជាច្រើនយល់ច្រឡំថា ការរំលងអាហារពេលព្រឹកអាចជួយកាត់បន្ថយកាឡូរី និងធ្វើឱ្យស្រកទម្ងន់។ ប៉ុន្តែ នេះជាគំនិតខុសស្រឡះ!
–ផលប៉ះពាល់៖ នៅពេលអ្នកទុកឱ្យពោះទទេរាប់ម៉ោងបន្ទាប់ពីភ្ញាក់ពីគេង រាងកាយនឹងយល់ថាអ្នកកំពុងខ្វះអាហារ វាថែមទាំងកាត់បន្ថយល្បឿននៃប្រព័ន្ធដុតរំលាយអាហារ (Metabolism) ដើម្បីរក្សាថាមពលទុក។
–លទ្ធផល៖ អ្នកនឹងមានអារម្មណ៍ឃ្លានខ្លាំងនៅពេលថ្ងៃត្រង់ និងពេលល្ងាច ដែលធ្វើឱ្យអ្នកញ៉ាំច្រើនហួសកម្រិតដោយមិនដឹងខ្លួន ជាពិសេសគឺចង់ញ៉ាំអាហារដែលមានជាតិស្ករ និងកាបូអ៊ីដ្រាតខ្ពស់។
២. ផឹកកាហ្វេផ្អែមខ្លាំង ឬកាហ្វេទឹកដោះគោជាដំបូងគេ
ការក្រោកពីគេងភ្លាម រត់ទៅរកកាហ្វេទឹកដោះគោខាប់ផ្អែមៗ ឬកាហ្វេត្រជាក់ដែលមានក្រែម (Whipped cream) ក្រាស់ៗ គឺជាការបំផ្លាញរាងកាយតាំងពីដើមដៃ។
–ផលប៉ះពាល់៖ ជាតិស្ករ និងកាឡូរីដ៏ច្រើនលើសលប់ពីភេសជ្ជៈទាំងនោះ នឹងធ្វើឱ្យកម្រិតជាតិស្ករក្នុងឈាមរបស់អ្នកកើនឡើងខ្ពស់កប់ពពកភ្លាមៗ។
–លទ្ធផល៖ បន្ទាប់ពីកើនឡើង វានឹងធ្លាក់ចុះមកវិញយ៉ាងលឿន ដែលធ្វើឱ្យអ្នកមានអារម្មណ៍អស់កម្លាំង ល្វើយ និងឃ្លានចំណីផ្អែមៗបន្តទៀតពេញមួយថ្ងៃ។ លើសពីនេះ រាងកាយដែលខ្វះជាតិទឹកពីការគេងពេញមួយយប់ ត្រូវការទឹកស្អាតជាដំបូង មិនមែនជាតិកាហ្វេអ៊ីន និងជាតិស្ករនោះទេ។
៣. ក្រោកពីគេងភ្លាម ចាប់ទូរសព្ទភ្លែត ឬរស់នៅក្នុងភាពស្រពិចស្រពិល
ការបើកភ្នែកឡើងភ្លាម ចាប់ទូរសព្ទមកអូសទស្សនា ឬដេកត្រាំនៅលើគ្រែក្នុងបន្ទប់ងងឹត មិនព្រមបើកបង្អួចទទួលពន្លឺថ្ងៃ គឺជាទម្លាប់អាក្រក់មួយទៀត។
–ផលប៉ះពាល់៖ ការមិនព្រមប្រឈមមុខនឹងពន្លឺព្រះអាទិត្យពេលព្រឹក ធ្វើឱ្យរាងកាយមិនអាចបង្កើតអរម៉ូន Cortisol បានត្រឹមត្រូវ ដែលវាជាអរម៉ូនជួយដាស់រាងកាយឱ្យមានថាមពល និងជួយដល់ការដុតរំលាយជាតិខ្លាញ់។ ម្យ៉ាងវិញទៀត ការអូសទូរសព្ទមើលព័ត៌មានស្រ្តេសៗតាំងពីព្រលឹម ធ្វើឱ្យកម្រិតស្ត្រេសកើនឡើង។
–លទ្ធផល៖ នៅពេលរាងកាយស្ត្រេស និងមិនទាន់ភ្ញាក់រលឹកពេញលេញ ប្រព័ន្ធដុតរំលាយអាហារនឹងដំណើរការយឺតយ៉ាវ ដែលងាយធ្វើឱ្យរាងកាយស្តុកទុកជាតិខ្លាញ់កាន់តែច្រើន។
ដើម្បីទទួលបានរាងកាយមាំមួន និងរាងស្អាត ក្រោយភ្ញាក់ពីគេង គួរផឹកទឹកស្អាត ១-២ កែវ រួចបើកបង្អួចទទួលពន្លឺថ្ងៃ និងទទួលទានអាហារពេលព្រឹកដែលមានប្រូតេអ៊ីន និងជាតិសរសៃ (Fiber) ខ្ពស់ ដើម្បីជម្រុញម៉ាស៊ីនដុតរំលាយអាហាររបស់អ្នកឱ្យដើរបានពេញមួយថ្ងៃ!